జన గళం ఆంధ్రప్రదేశ్ డెస్క్: ఏలూరు కలెక్టరేట్ ఎదుట ప్రభుత్వ వైద్య రంగంలో పనిచేస్తున్న కాంట్రాక్టు ఉద్యోగులు చేపట్టిన నిరసన కార్యక్రమం ఐదో రోజుకు చేరుకుంది. తమ డిమాండ్లను పరిష్కరించాలని కోరుతూ ఉద్యోగులు కొనసాగిస్తున్న ఆందోళనకు ఎమ్మార్పీఎస్ (MRPS) జాతీయ, రాష్ట్ర, జిల్లా నాయకులు ప్రత్యక్ష మద్దతు తెలిపారు. ఈ సందర్భంగా ప్రభుత్వ వైద్య రంగ కాంట్రాక్టు ఉద్యోగులను వెంటనే రెగ్యులర్ చేయాలని, వంద శాతం గ్రాస్ జీతం చెల్లించాలని, ఉద్యోగులందరికీ హెల్త్ కార్డులు అందించాలని, అలాగే ఉద్యోగ సమయాల్లో ఎవరైనా మరణిస్తే వారి కుటుంబ సభ్యులకు యాభై లక్షల రూపాయల ఆర్థిక సహాయం అందజేయాలని డిమాండ్ చేశారు.
వైద్య రంగంలో క్షేత్రస్థాయిలో అంకితభావంతో సేవలందిస్తున్న కాంట్రాక్టు ఉద్యోగుల సమస్యలను ప్రభుత్వం తక్షణమే పరిష్కరించాలని నాయకులు డిమాండ్ చేశారు. ఏళ్లుగా అరకొర వేతనాలతో ఇబ్బందులు పడుతున్న కాంట్రాక్టు సిబ్బందిని క్రమబద్ధీకరించాలని కోరారు. ఉద్యోగుల హక్కుల సాధన కోసం వారు చేపట్టిన ఈ న్యాయమైన పోరాటానికి తమ వంతు సంపూర్ణ సహకారం ఉంటుందని, ప్రభుత్వం స్పందించి వారి డిమాండ్లను నెరవేర్చే వరకు అండగా నిలుస్తామని స్పష్టం చేశారు.
ఈ నిరసన కార్యక్రమంలో ఎమ్మార్పీఎస్ ప్రముఖ నాయకులు నమ్మిన లక్ష్మి కుమారి, తనగాల శేఖర్ మాదిగ, కాశీ కృష్ణ మాదిగ, మద్దల తిరుపతి రావు మాదిగ, కొలిక్కపాము ఏసు, చోడిమేలా వీరయ్య తదితరులు పాల్గొని ఉద్యోగులకు సంఘీభావం తెలిపారు. కాంట్రాక్టు ఉద్యోగుల సమస్యలపై ప్రభుత్వ తీరును ఎండగడుతూ భవిష్యత్ పోరాటాలపై చర్చించారు.
Slug: eluru-collectorate-medical-contract-employees-protest-mrps-support