జన గళం ఆంధ్రప్రదేశ్ డెస్క్: ఇంద్రకీలాద్రిపై వైభవంగా జరుగుతున్న దసరా శరన్నవరాత్రుల మహోత్సవాల్లో భాగంగా శ్రీ అన్నపూర్ణాదేవి అలంకారంలో కొలువుదీరిన దుర్గమ్మ దర్శనానికి భక్తులు పోటెత్తారు. ఈ సందర్భంగా క్యూలైన్లలో వేచి ఉన్న భక్తుల వద్దకు జిల్లా కలెక్టర్ డాక్టర్ జి. లక్ష్మీశ నేరుగా వెళ్లి క్షేత్రస్థాయిలో ఏర్పాట్లను పరిశీలించారు. అమ్మవారి దర్శనం కోసం క్యూలైన్లలో ముందుకు సాగుతున్న భక్తులతో స్వయంగా ముఖాముఖి మాట్లాడుతూ దర్శనంలో ఏమైనా ఇబ్బందులు ఎదురవుతున్నాయా అని వివరాలు అడిగి తెలుసుకున్నారు.
క్యూలైన్లలో భక్తులకు అందుతున్న తాగునీటి సరఫరా, పాలు, ప్రసాదాల పంపిణీ వివరాలను అధికారుల ద్వారా సమీక్షించారు. సుదూర ప్రాంతాల నుంచి వచ్చే భక్తులకు కనీస అసౌకర్యం కలగకుండా అధికారులు నిరంతరం అప్రమత్తంగా వ్యవహరించాలని స్పష్టం చేశారు. ముఖ్యంగా బారికేడ్ల నిర్వహణ, భద్రతా ఏర్పాట్లు పక్కాగా ఉండాలని, రద్దీ నియంత్రణలో సిబ్బంది అత్యంత సమన్వయంతో విధులు నిర్వర్తించాలని అధికారులకు దిశానిర్దేశం చేశారు.
శరన్నవరాత్రుల రద్దీ దృష్ట్యా సామాన్య భక్తులకు ప్రాధాన్యత కల్పిస్తూ ఎక్కడా తొక్కిసలాటలు, జాప్యం జరగకుండా చూడాలని కలెక్టర్ ఆదేశించారు. భక్తుల నుంచి ఫీడ్‌బ్యాక్ తీసుకుంటూ ఏర్పాట్లను మరింత పటిష్టం చేసేలా అన్ని విభాగాల అధికారులు క్షేత్రస్థాయిలోనే పర్యవేక్షణ కొనసాగించాలని ఆదేశాలు జారీ చేశారు.