జన గళం ఆంధ్రప్రదేశ్ డెస్క్: విజయవాడ నగర పాలక సంస్థ పరిధిలోని తూర్పు నియోజకవర్గంలో డివిజన్ల పునర్విభజన మరియు రిజర్వేషన్ల కేటాయింపు వ్యవహారం రాజకీయంగా తీవ్ర ఉద్రిక్తతకు దారితీస్తోంది. క్షేత్రస్థాయిలో జనసేన పార్టీకి తిరుగులేని పట్టున్న కృష్ణలంక ప్రాంతంలోని కీలక డివిజన్లను లక్ష్యంగా చేసుకుని అణచివేసే కుట్రలు జరుగుతున్నాయని స్థానిక కేడర్ బహిరంగంగానే నిరసన గళం విప్పుతోంది. బలమైన నాయకత్వం, గెలుపు అవకాశాలు పుష్కలంగా ఉన్న డివిజన్లను కావాలనే మహిళా రిజర్వేషన్ల పరిధిలోకి నెట్టివేస్తూ జనసేన పోటీని అడ్డుకునే ఎత్తుగడలు వేస్తున్నారని పార్టీ వర్గాలు మండిపడుతున్నాయి.
ఇదే సమయంలో నియోజకవర్గ పరిధిలోని పడమట లంక, కరెన్సీ నగర్, చౌదరి పేట, భారతీనగర్ తదితర ప్రాంతాల్లో స్థానిక సమీకరణాలను ఏకపక్షంగా మార్చివేశారనే విమర్శలు తీవ్రస్థాయికి చేరాయి. ఆయా ప్రాంతాల్లో అధికార పార్టీకి అనుకూలంగా ఉండే ఒకే నిర్దిష్ట సామాజిక వర్గానికి అత్యధిక ప్రాధాన్యత ఇస్తూ నిర్ణయాలు తీసుకోవడం కూటమి అంతర్గత సంబంధాలను దెబ్బతీసేలా ఉందని కార్యకర్తలు ఆవేదన వ్యక్తం చేస్తున్నారు. జనసేనను రాజకీయంగా ఎదగనీయకుండా కట్టడి చేసేలా స్థానిక స్థాయిలోనే ప్రణాళికాబద్ధంగా చక్రం తిప్పుతున్నారని జనసైనికులు నేరుగా ఆరోపిస్తున్నారు.
పార్టీని క్షేత్రస్థాయిలో నిర్వీర్యం చేసే ఈ చర్యలను ఎట్టిపరిస్థితుల్లోనూ సహించేది లేదని జనసేన శ్రేణులు స్పష్టం చేస్తున్నాయి. నియోజకవర్గ సమన్వయం దెబ్బతినకుండా ఉండేందుకు నారా చంద్రబాబు నాయుడు, పవన్ కళ్యాణ్, నారా లోకేష్ తదితర అగ్ర నాయకత్వం జోక్యం చేసుకోవాలని కోరుతున్నారు. అలాగే స్థానిక సమన్వయ బాధ్యతలు చూస్తున్న నాయకులు ఈ అసమానతలను అధిష్టానం దృష్టికి తీసుకెళ్లి న్యాయబద్ధంగా రిజర్వేషన్లు అమలయ్యేలా చూడాలని డిమాండ్ చేస్తున్నారు.