జన గళం : దేశంలో ఒకవైపు టాటా వంటి పారిశ్రామిక దిగ్గజాలు తమ జీవితకాలంలో లక్షల కోట్ల రూపాయలను ప్రజా ప్రయోజనాలకు, దాతృత్వానికి వినియోగిస్తుంటే, మరోవైపు వ్యవస్థను పట్టిపీడిస్తున్న అవినీతి మూలాలు ప్రజలను తీవ్ర ఇబ్బందులకు గురిచేస్తున్నాయి. నేరుగా కాకుండా తెరవెనుక బ్రోకర్లు, మధ్యవర్తుల ద్వారా అధికారులపై టార్గెట్లు పెట్టి వసూళ్లకు పాల్పడుతున్న విధానం తీవ్ర చర్చనీయాంశంగా మారింది. సబ్ రిజిస్ట్రార్ కార్యాలయాల వంటి కీలక విభాగాల్లో వార్షిక వసూళ్ల లక్ష్యాలు నిర్దేశించడం వల్ల కింది స్థాయి అధికారులు సైతం తప్పనిసరి పరిస్థితుల్లో సామాన్యులను పీల్చి పిప్పిచేస్తున్నారనే విమర్శలు వ్యక్తమవుతున్నాయి.
మరోవైపు ఎన్నికల వేళ కోట్లాది రూపాయల ఖర్చు, ఓటుకు నోటు సంస్కృతి ప్రజాస్వామ్య వ్యవస్థను పతనావస్థకు చేరుస్తున్నాయి. పెట్టిన ఖర్చును అధికారంలోకి వచ్చాక వడ్డీతో సహా రాబట్టుకునే ధోరణితో పాటు, పారిశుద్ధ్య కాంట్రాక్టులు మరియు వైద్య రంగంలో మాఫియా కార్యకలాపాలు పెరిగిపోతున్నాయి. ముఖ్యంగా సత్తెనపల్లి వంటి ప్రాంతాల్లో నాసిరకం ఔషధాలను అధిక ధరలకు విక్రయిస్తూ ప్రజారోగ్యంతో చెలగాటమాడుతున్న ముఠాల వెనుక ప్రభావవంతమైన వ్యక్తుల పేర్లు వినిపిస్తుండటంపై సర్వత్రా నిరసన వ్యక్తమవుతోంది.
