మచిలీపట్నం: ఏపీ స్థానిక సంస్థల పరిషత్ ఎన్నికల్లో ఎన్డీఏ కూటమి చారిత్రక రికార్డు విజయం నమోదు చేసిన వేళ.. ఉమ్మడి కృష్ణా జిల్లా కేంద్రంగా స్థానిక సంస్థల పదవుల పంపకాలపై రాజకీయ సమీకరణాలు అత్యంత ఆసక్తికరమైన మలుపు తిరిగాయి. ప్రధానంగా కృష్ణా జిల్లా పరిషత్ (ZP) పీఠాన్ని ఒకవేళ తెలుగుదేశం పార్టీకి కేటాయిస్తే.. అత్యంత ప్రతిష్టాత్మకమైన జిల్లా పరిషత్ వైస్ ఛైర్మన్ (ఉపాధ్యక్ష) పీఠం ఎవరికి దక్కుతుందనే అంశంపై కూటమి మిత్రపక్షాలైన జనసేన, బీజేపీల మధ్య తెరవెనుక సరికొత్త చర్చ మొదలైంది.
- టీడీపీ లెక్కలు.. సామాజిక సమీకరణాలు:
ఉమ్మడి కృష్ణా జిల్లాలోని రాజకీయ, సామాజిక సమీకరణాలను నిశితంగా పరిశీలిస్తే.. రాజధాని ప్రాంతానికి ఆనుకుని ఉన్న ప్రతిష్టాత్మక విజయవాడ నగర కార్పొరేషన్ మేయర్ పీఠాన్ని కూటమి వ్యూహంలో భాగంగా జనసేన పార్టీ నేత శ్రీ వంగవీటి రాధాకృష్ణ గారికి కేటాయించి గెలిపించుకున్నారు. మరోవైపు ఎన్టీఆర్ జిల్లా పరిషత్ ఛైర్‌పర్సన్ స్థానం ఎస్సీ జనరల్‌కు రిజర్వ్ అయింది. ఈ నేపథ్యంలో ఉమ్మడి కృష్ణా జిల్లాలో తెలుగుదేశం పార్టీకి బలమైన పునాదిగా ఉన్న కీలక సామాజిక వర్గానికి (కమ్మ సామాజిక వర్గం) తగిన ప్రాతినిధ్యం కల్పించాల్సిన బాధ్యత టీడీపీపై ఉంది. అందుకే కృష్ణా జిల్లా పరిషత్ ఛైర్మన్ పీఠాన్ని టీడీపీకి కేటాయించి, ఆ సామాజిక వర్గానికి న్యాయం చేయాలనే ఆలోచనలో టీడీపీ అధిష్ఠానం ఉన్నట్లు ప్రచారం జరుగుతోంది. - వైస్ ఛైర్మన్ పీఠంపై జనసేన పట్టు.. నలుగురు విజేతల్లో ఎవరికో?:
ఒకవేళ కృష్ణా జడ్పీ ఛైర్మన్ స్థానాన్ని టీడీపీ తీసుకుంటే.. ఖచ్చితంగా ఉపాధ్యక్ష పీఠాన్ని జనసేన పార్టీకే కేటాయించాలని గ్లాస్ పార్టీ శ్రేణులు బలంగా డిమాండ్ చేస్తున్నాయి. కృష్ణా జిల్లాలో కూటమి ఒప్పందంలో భాగంగా ఐదు చోట్ల జడ్పీటీసీ స్థానాల్లో జనసేన పోటీ చేయగా.. మొవ్వ స్థానంలో చేదు అనుభవం ఎదురైనప్పటికీ, మిగిలిన నాలుగు స్థానాలైన ఘంటసాల, మోపిదేవి (అవనిగడ్డ నియోజకవర్గం), గుడ్లవల్లేరు (గుడివాడ నియోజకవర్గం), కృత్తివెన్ను (పెడన నియోజకవర్గం)లలో జనసేన అభ్యర్థులు ప్రభంజనం సృష్టించి ఘన విజయం సాధించారు. ఈ గెలిచిన నలుగురు జడ్పీటీసీలలో ఒకరికి వైస్ ఛైర్మన్ పదవి దక్కాలని పార్టీ పట్టుబడుతోంది. ఈ ఎంపిక ప్రక్రియలో అవనిగడ్డ జనసేన ఎమ్మెల్యే శ్రీ మండలి బుద్ధప్రసాద్, గుడివాడ టీడీపీ ఎమ్మెల్యే శ్రీ వెనిగండ్ల రాము, పెడన టీడీపీ ఎమ్మెల్యే శ్రీ కాగిత కృష్ణప్రసాద్‌లతో పాటు మచిలీపట్నం పార్లమెంట్ సభ్యులు శ్రీ వల్లభనేని బాలశౌరి అభిప్రాయాలను జనసేన అధిష్ఠానం పరిగణనలోకి తీసుకుంటోంది. అలాగే ప్రతి నియోజకవర్గంలో నియమించిన జనసేన పార్టీ సమన్వయకర్తల కమిటీ ఫీడ్‌బ్యాక్‌ను కూడా సేకరిస్తున్నారు. - బీజేపీ వ్యూహాత్మక డిమాండ్:
ఇదే సమయంలో కూటమిలోని మరో భాగస్వామ్య పక్షమైన బీజేపీ కూడా వైస్ ఛైర్మన్ పీఠంపై ఆశలు పెట్టుకుని లాబీయింగ్ ముమ్మరం చేసింది. ఎన్టీఆర్ జిల్లాలో విజయవాడ మేయర్ స్థానం జనసేనకు దక్కిందని, కృష్ణా జడ్పీ ఛైర్మన్ పీఠం టీడీపీ తీసుకుంటున్నప్పుడు.. కూటమి ధర్మం ప్రకారం మూడో భాగస్వామి అయిన బీజేపీకి న్యాయం జరగాలంటే కృష్ణా జడ్పీ వైస్ ఛైర్మన్ పదవిని తమకే కేటాయించాలని కమలం నేతలు వాదిస్తున్నారు. - అధిష్ఠానం వద్దకు నివేదికలు.. IVRS సర్వేలు:
ఈ ఉత్కంఠకు తెరదించేందుకు జనసేన, కూటమి హెడ్ ఆఫీసుల నుంచి సెంట్రల్ కమిటీ క్షేత్రస్థాయి నివేదికలను ఇప్పటికే తెప్పించుకుంది. అభ్యర్థుల ప్రజాబలం, పార్టీ పట్ల విధేయత, సామాజిక సమీకరణాలపై సూక్ష్మ పరిశీలన జరపడమే కాకుండా.. అంతర్గతంగా ఐవీఆర్ఎస్ (IVRS) కాల్స్ ద్వారా ప్రజాభిప్రాయాన్ని సేకరిస్తున్నట్లు తెలుస్తోంది. టీడీపీ సామాజిక లెక్కలు నెగ్గి జడ్పీ పీఠం దక్కితే.. ఉపాధ్యక్ష పీఠాన్ని క్షేత్ర బలం రీత్యా జనసేనకు ఇస్తారా లేక కూటమి బ్యాలెన్స్ కోటాలో బీజేపీకి కేటాయిస్తారా అన్నది ఇప్పుడు కృష్ణా జిల్లా రాజకీయాల్లో హాట్ టాపిక్‌గా మారింది.