జన గళం ఆంధ్రప్రదేశ్ డెస్క్: నెల్లూరు జిల్లా ఆత్మకూరు నియోజకవర్గ స్థానిక సంస్థల ఎన్నికల జనసేన పార్టీ కో-ఆర్డినేషన్ కమిటీలో మర్రిపాడు మండలానికి చెందిన ప్రముఖ మహిళా నాయకురాలు ప్రమీల ఓరుగంటికి చోటు లభించింది. ఆత్మకూరు నియోజకవర్గ స్థానిక ఎన్నికల కో-ఆర్డినేషన్ కమిటీలో ఆమెను నియమిస్తూ జనసేన పార్టీ అధినేత, రాష్ట్ర ఉప ముఖ్యమంత్రి కొణిదెల పవన్ కళ్యాణ్ ఆదేశాలు జారీ చేశారు. రాబోయే స్థానిక సంస్థల ఎన్నికల్లో పార్టీ విజయాన్ని ఖరారు చేయడమే లక్ష్యంగా ఈ కమిటీని ఏర్పాటు చేశారు.
ఈ కమిటీ ద్వారా నియోజకవర్గంలో పార్టీ అభ్యర్థుల విజయానికి కృషి చేయడం, నాయకులు మరియు కార్యకర్తల మధ్య మెరుగైన సమన్వయం సాధించడం, ఎన్నికల వ్యూహాలను క్షేత్రస్థాయిలో సమర్థవంతంగా అమలు చేయడం ప్రధాన బాధ్యతలుగా నిర్ణయించారు. ఈ నేపథ్యంలో ప్రమీల ఓరుగంటికి కో-ఆర్డినేషన్ కమిటీలో స్థానం కల్పించడం పట్ల మర్రిపాడు మండలం మరియు ఆత్మకూరు నియోజకవర్గ జనసేన పార్టీ శ్రేణులు తీవ్ర హర్షం వ్యక్తం చేశారు.
ఈ సందర్భంగా ప్రమీల ఓరుగంటి మాట్లాడుతూ తనపై నమ్మకంతో స్థానిక ఎన్నికల కమిటీలో కీలక అవకాశం కల్పించిన పార్టీ అధినేత పవన్ కళ్యాణ్‌కు ప్రత్యేక కృతజ్ఞతలు తెలియజేశారు. నియోజకవర్గంలో పార్టీ బలోపేతానికి, స్థానిక సంస్థల ఎన్నికల్లో జనసేన అభ్యర్థుల ఘన విజయానికి శక్తివంచన లేకుండా కృషి చేస్తానని స్పష్టం చేశారు. పార్టీ విజయం కోసం నాయకులు, కార్యకర్తలతో కలిసికట్టుగా ముందుకు సాగుతానని వెల్లడించారు.