నరసాపురంలోని ప్రముఖ నగల దుకాణంలో 20 ఏళ్లుగా పనిచేస్తున్న గుమస్తా చోరీకి పాల్పడిన కేసును పోలీసులు 12 గంటల్లో ఛేదించారు. రూ.52.65 లక్షల విలువైన 405 గ్రాముల బంగారు ఆభరణాలను స్వాధీనం చేసుకుని నిందితుడిని అరెస్ట్ చేశారు.
జనగళం న్యూస్ డెస్క్: నరసాపురం పట్టణంలోని ఓ నగల దుకాణంలో జరిగిన భారీ బంగారం చోరీ కేసును స్థానిక పోలీసులు అత్యంత వేగంగా ఛేదించారు. కేసు నమోదైన కేవలం 12 గంటల వ్యవధిలోనే నిందితుడిని గుర్తించి అదుపులోకి తీసుకోవడంతో పాటు చోరీకి గురైన సొత్తును పూర్తిగా రికవరీ చేశారు. దుకాణంలో సుమారు రెండు దశాబ్దాలుగా ఎంతో నమ్మకంగా పనిచేస్తున్న ఓ పాత గుమస్తానే ఈ చోరీకి పాల్పడినట్లు దర్యాప్తులో నిర్ధారణ కావడంతో వ్యాపార వర్గాల్లో తీవ్ర చర్చనీయాంశంగా మారింది.
పోలీసుల ప్రాథమిక సమాచారం మేరకు.. నరసాపురంలోని ‘జైన్ జ్యువెల్ పార్క్’ షోరూమ్‌లో షేక్ లాల్ సాహెబ్ అనే వ్యక్తి దాదాపు 20 సంవత్సరాల నుంచి నమ్మకమైన గుమస్తాగా విధులు నిర్వహిస్తున్నాడు. అయితే, అతడు బెట్టింగుల వ్యసనానికి బానిసయ్యాడు. బెట్టింగుల కారణంగా తీవ్రస్థాయిలో అప్పులపాలైన లాల్ సాహెబ్, ఆ ఆర్థిక సమస్యల నుంచి బయటపడేందుకు తాను పనిచేస్తున్న నగల దుకాణాన్నే లక్ష్యంగా చేసుకున్నాడు. యాజమాన్యానికి అనుమానం రాకుండా ఉండేందుకు ఒకేసారి కాకుండా, విడతలవారీగా బంగారు ఆభరణాలను తస్కరించడం ప్రారంభించాడు. ఈ క్రమంలో మొత్తం 405 గ్రాముల బంగారాన్ని చోరీ చేశాడు. స్వాధీనం చేసుకున్న ఈ ఆభరణాల విలువ సుమారు రూ.52.65 లక్షల వరకు ఉంటుందని పోలీసులు వెల్లడించారు.
దుకాణంలో బంగారు నగలు కొరవడిన విషయాన్ని గుర్తించిన యజమానులు వెంటనే పోలీసులను ఆశ్రయించి ఫిర్యాదు చేశారు. రంగంలోకి దిగిన దర్యాప్తు బృందాలు దుకాణంలోని సీసీటీవీ ఫుటేజీలను క్షుణ్ణంగా పరిశీలించాయి. ఇతర విశ్వసనీయ సమాచారం, సాంకేతిక ఆధారాల సహాయంతో గుమస్తా కదలికలపై నిఘా ఉంచారు. అతడే నేరానికి పాల్పడినట్లు ఆధారాలు లభించడంతో నిందితుడి ఇంటి వద్ద మాటువేసి అతడిని అదుపులోకి తీసుకున్నారు.
పోలీసుల విచారణలో నిందితుడు చోరీ వ్యవహారాన్ని అంగీకరించాడు. అనంతరం నిందితుడి నివాసంలో దాచిపెట్టిన కొంత బంగారంతో పాటు, సమీపంలోని భీమవరం పట్టణంలో గల రెండు దుకాణాల్లో పెట్టిన మిగిలిన బంగారు ఆభరణాలను పోలీసులు విజయవంతంగా స్వాధీనం చేసుకున్నారు. కేసు నమోదు చేసుకున్న 12 గంటల రికార్డు సమయంలోనే నిందితుడిని పట్టుకుని చోరీ సొత్తును రికవరీ చేసిన నరసాపురం టౌన్ సీఐ రఘు ఆకుల, ఎస్ఐలతో పాటు దర్యాప్తులో పాల్గొన్న సిబ్బందిని జిల్లా ఎస్పీ అద్నాన్ నయీం అస్మి ఐపీఎస్ అభినందించారు. విధి నిర్వహణలో చురుగ్గా వ్యవహరించిన పోలీసు సిబ్బందికి శాఖాపరంగా రివార్డులను సిఫారసు చేస్తున్నట్లు తెలిపారు.
ఈ సందర్భంగా పోలీసు అధికారులు వ్యాపారులకు కీలక సూచనలు జారీ చేశారు. బంగారు వ్యాపారులు తమ వద్ద పనిచేసే సిబ్బంది విషయంలో ఎల్లప్పుడూ అప్రమత్తంగా ఉండాలని స్పష్టం చేశారు. దుకాణాల్లోని స్టాక్‌ను ఏ రోజుకారోజు కచ్చితంగా లెక్క చూసుకోవాలని, నిల్వల తనిఖీలను క్రమం తప్పకుండా నిర్వహించాలని సూచించారు.