జన గళం అవనిగడ్డ/కోడూరు బ్యూరో: విద్యార్థుల సంపూర్ణ శారీరక ఎదుగుదలకు, మానసిక వికాసానికి అయోడిన్ పోషకం ఎంతో కీలకమని వైద్య ఆరోగ్య శాఖ అధికారులు స్పష్టం చేశారు. కృష్ణా జిల్లా కోడూరు మండల కేంద్రంలోని స్థానిక జిల్లా పరిషత్ ఉన్నత పాఠశాల (ZPHS) ఆవరణలో వైద్య ఆరోగ్య శాఖ ఆధ్వర్యంలో జాతీయ అయోడిన్ లోప నివారణ కార్యక్రమం (NIDDCP – National Iodine Deficiency Disorders Control Programme) పై విద్యార్థులకు ప్రత్యేక అవగాహన సదస్సు నిర్వహించారు.
ఈ సందర్భంగా వైద్య ఆరోగ్య శాఖ ప్రతినిధులు మాట్లాడుతూ.. ఆహారంలో అయోడిన్ లోపం వల్ల సామాన్య ప్రజలు, ముఖ్యంగా పెరుగుతున్న వయస్సు గల పిల్లలు అనేక శారీరక, మానసిక సమస్యలకు గురయ్యే ప్రమాదం ఉందన్నారు. అయోడిన్ లోపం వల్ల గాయిటర్ (గొంతు వాపు), హైపోథైరాయిడిజం, జ్ఞాపకశక్తి మందగించడం, మరుగుజ్జుతనం వంటి రుగ్మతలు వచ్చే అవకాశం ఉందని హెచ్చరించారు. నిత్య జీవితంలో వంటలలో నాణ్యమైన అయోడైజ్డ్ ఉప్పును మాత్రమే ఉపయోగించాలని, ఈ విషయంలో ప్రతి విద్యార్థి తమ కుటుంబ సభ్యులకు, పరిసర ప్రాంతాల వారికి చైతన్యం కలిగించాలని పిలుపునిచ్చారు. అనంతరం విద్యార్థుల సందేహాలను నివృత్తి చేస్తూ పోషకాహార ప్రాముఖ్యతను వివరించారు. ఈ కార్యక్రమంలో పాఠశాల ప్రధానోపాధ్యాయులు, ఉపాధ్యాయ బృందం, వైద్య సిబ్బంది మరియు పెద్ద సంఖ్యలో విద్యార్థులు పాల్గొన్నారు.
