కృష్ణా జిల్లాలోని ప్రముఖ చేనేత, కలంకారీ హబ్గా గుర్తింపు పొందిన పెడన పట్టణ రైల్వే స్టేషన్లో కనీస మౌలిక వసతులు కరవయ్యాయి. నిత్యం ప్రయాణికులతో రద్దీగా ఉండే ఈ స్టేషన్లో అత్యంత ఆవశ్యకమైన మరుగుదొడ్ల నిర్మాణం అసంపూర్తిగా మిగిలిపోవడం పట్ల స్థానికులు, ప్రయాణికులు తీవ్ర అసహనం వ్యక్తం చేస్తున్నారు. అధికారుల అలసత్వం కారణంగా ప్రయాణికులకు అవమానకర పరిస్థితులు ఎదురవుతున్నాయని పెడన జాయింట్ యాక్షన్ కమిటీ (జేఏసీ) మండిపడింది.
రైల్వే స్టేషన్లోని శౌచాలయాల నిర్మాణం, నిర్వహణ విషయాల్లో అధికారుల నిర్లక్ష్యం స్పష్టంగా కనిపిస్తోంది. పురుషుల మరుగుదొడ్ల నిర్మాణం పూర్తికాకపోవడంతో వాటికి చెక్క బోర్డులు అడ్డం పెట్టి చేతులు దులుపుకున్నారు. దీంతో అత్యవసర సమయాల్లో పురుషులు, వృద్ధులు వేరే మార్గం లేక మహిళల టాయిలెట్లను ఆశ్రయించాల్సి వస్తోంది.
మహిళా విభాగంలోకి పురుషులు రావడంతో అక్కడ తీవ్ర అసౌకర్యం కలుగుతోంది. ఈ విషయంలో ప్రయాణికుల మధ్య నిత్యం వాగ్వాదాలు, ఘర్షణలు చోటుచేసుకుంటున్నాయి. వాడకంలో లేని మరుగుదొడ్లకు కేవలం ‘జెంట్స్’, ‘లేడీస్’ అని బోర్డులు తగిలించి వదిలేస్తే ప్రయోజనం ఏమిటని ప్రయాణికులు తీవ్రంగా ప్రశ్నిస్తున్నారు.
కలంకారీ కళతో దేశవిదేశాల్లో ఖ్యాతిగాంచిన పెడనకు వ్యాపార, పర్యాటక రీత్యా నిత్యం వందలాది మంది ప్రయాణికులు రైళ్లలో రాకపోకలు సాగిస్తుంటారు. అంతటి కీలకమైన కేంద్రంలో శౌచాలయాలు, విశ్రాంతి గదులు వంటి కనీస సదుపాయాలు అందుబాటులో లేకపోవడం అధికారుల బాధ్యతారాహిత్యానికి నిదర్శనమని జేఏసీ నేతలు ఆగ్రహం వ్యక్తం చేశారు.
ఈ తీవ్ర సమస్యపై విజయవాడ, భీమవరం రైల్వే అధికారులకు ఫోన్ ద్వారా ఇప్పటికే సమాచారం అందించినట్లు జేఏసీ నేత శ్రీనివాస్ వీణం తెలిపారు. కాంట్రాక్టర్ల అలసత్వంపై అధికారులు కఠిన చర్యలు తీసుకోవాలని ఆయన డిమాండ్ చేశారు. గడువులోగా పనులు పూర్తి చేయని పక్షంలో సంబంధిత కాంట్రాక్టును రద్దు చేసి, వేరొకరితో తక్షణమే పనులు పూర్తి చేయించాలని కోరారు.
రైల్వే శాఖ వెంటనే స్పందించి పెండింగ్లో ఉన్న పనులను పునరుద్ధరించాలని జేఏసీ నాయకులు స్పష్టం చేశారు. ఒకవేళ సమస్యను పరిష్కరించకపోతే ప్రయాణికులను కలుపుకుని పెద్ద ఎత్తున ప్రజా ఉద్యమం చేపడతామని శ్రీనివాస్ వీణం మిత్రబృందం, ఐక్య కార్యాచరణ కమిటీ హెచ్చరించాయి.