జన గళం కాకినాడ డెస్క్: కాకినాడ జిల్లా ప్రత్తిపాడు నియోజకవర్గానికి చెందిన మాజీ ఎమ్మెల్యే, వైసీపీ నేత వరుపుల సుబ్బారావు జనసేన పార్టీలో చేరారు. సోమవారం పిఠాపురంలో జనసేన అధినేత, రాష్ట్ర ఉప ముఖ్యమంత్రి పవన్ కల్యాణ్ సమక్షంలో ఆయన పార్టీలో చేరారు. పవన్ కల్యాణ్ జనసేన కండువా కప్పి సుబ్బారావును పార్టీలోకి ఆహ్వానించారు.
వరుపుల సుబ్బారావుతో పాటు పెద్దాపురం, సామర్లకోట ప్రాంతాలకు చెందిన పలువురు వైసీపీ నాయకులు, మాజీ మున్సిపల్ కౌన్సిలర్లు కూడా జనసేనలో చేరారు. ప్రత్తిపాడు, పెద్దాపురం, జగ్గంపేట నియోజకవర్గాలకు చెందిన పలువురు నాయకులు ఈ చేరికల్లో ఉన్నట్లు పార్టీ వర్గాలు తెలిపాయి.
పెద్దాపురం మాజీ మున్సిపల్ వైస్ చైర్మన్ నెక్కంటి సాయి ప్రసాద్, సామర్లకోట మాజీ మున్సిపల్ చైర్మన్ గంగిరెడ్డి అరుణతో పాటు పలువురు మాజీ కౌన్సిలర్లు జనసేనలో చేరిన వారిలో ఉన్నారు. చేరిన నాయకులకు పవన్ కల్యాణ్ పార్టీ కండువాలు కప్పి ఆహ్వానించారు.
కాకినాడ ఎంపీ తంగెళ్ల ఉదయ్ శ్రీనివాస్, రూరల్ ఎమ్మెల్యే పంతం నానాజీ, డీసీసీబీ ఛైర్మన్ తుమ్మల రామస్వామి ఆధ్వర్యంలో ఈ చేరికలు జరిగినట్లు తెలిపారు. కార్యక్రమంలో పలువురు జనసేన నాయకులు, ప్రజాప్రతినిధులు పాల్గొన్నారు. స్థానిక సంస్థల ఎన్నికలకు పార్టీ సన్నద్ధమవుతున్న సమయంలో కాకినాడ జిల్లాలో జరిగిన ఈ చేరికలు రాజకీయంగా చర్చనీయాంశంగా మారాయి.