జన గళం ఎన్టీఆర్ జిల్లా డెస్క్: కృష్ణా జిల్లా బార్ ఫెడరేషన్ పిలుపు మేరకు తిరువూరు బార్ అసోసియేషన్ న్యాయవాదులు సోమవారం విధులను బహిష్కరించారు. విజయవాడ బార్ అసోసియేషన్ సభ్యుడు పోలిశెట్టి హరిబాబుపై నమోదైన ఎఫ్ఐఆర్ను నిరసిస్తూ ఈ కార్యక్రమం చేపట్టారు.
ఈ సందర్భంగా న్యాయవాదులు మాట్లాడుతూ న్యాయవాదులపై అక్రమంగా కేసులు నమోదు చేయకుండా వారి వృత్తిపరమైన హక్కులు, భద్రతను పరిరక్షించాల్సిన అవసరం ఉందన్నారు. న్యాయవాదుల రక్షణ కోసం అడ్వకేట్ ప్రొటెక్షన్ యాక్ట్ను ప్రభుత్వం వెంటనే తీసుకురావాలని డిమాండ్ చేశారు.
న్యాయవాదులపై జరుగుతున్న దాడులు, వేధింపులను అరికట్టేందుకు ప్రభుత్వం తక్షణ చర్యలు తీసుకోవాలని కోరారు. న్యాయవాదుల వృత్తిపరమైన భద్రతకు సమగ్ర చట్టపరమైన రక్షణ కల్పించాలని వారు పేర్కొన్నారు.
ఈ కార్యక్రమంలో తిరువూరు న్యాయవాదుల సంఘం అధ్యక్షుడు సంకురాత్రి జనార్ధనరావు, కార్యదర్శి కనపర్తి రాంబాబు, సీనియర్ న్యాయవాదులు, బార్ అసోసియేషన్ సభ్యులు పాల్గొన్నారు.