జన గళం ఆంధ్రప్రదేశ్ డెస్క్: విజయవాడ శ్రీ దుర్గా మల్లేశ్వర స్వామి వార్ల దేవస్థానంలో త్వరలో ప్రారంభం కానున్న దసరా శరన్నవరాత్రి మహోత్సవాలను పురస్కరించుకుని ఇంద్రకీలాద్రి ఘాట్‌రోడ్డును వారం రోజుల పాటు పూర్తిగా మూసివేస్తున్నట్లు ఆలయ అధికారులు, నగర ట్రాఫిక్ పోలీసులు ప్రకటించారు. నవరాత్రుల సమయంలో రాష్ట్రం నలుమూలల నుంచే కాకుండా ఇతర రాష్ట్రాల నుంచి కూడా లక్షలాది మంది భక్తులు తరలివచ్చే అవకాశం ఉన్నందున, భక్తుల రక్షణ మరియు సౌకర్యాన్ని దృష్టిలో ఉంచుకుని అత్యవసర మరమ్మతు పనులను చేపట్టారు.
ఈ వారం రోజుల వ్యవధిలో కొండపై నుంచి రాళ్లు, మట్టి జారిపడకుండా రక్షణ వలలను సరిచేయడంతో పాటు రోడ్డుపై గుంతలు పూడ్చడం, పటిష్టమైన బారికేడ్ల ఏర్పాటు, విద్యుద్దీపాల మరమ్మతులు వంటి కీలక అభివృద్ధి పనులను యుద్ధప్రాతిపదికన పూర్తి చేయనున్నారు. మరమ్మతు పనులు జరుగుతున్న సమయంలో ఘాట్‌రోడ్డు మార్గంలో అన్ని రకాల వాహనాల రాకపోకలను పూర్తిగా నిషేధించారు. ప్రముఖుల వాహనాలకు కూడా అనుమతి ఉండదు. అమ్మవారి దర్శనార్థం వచ్చే భక్తులు మెట్ల మార్గాన్ని లేదా ప్రత్యామ్నాయ మార్గాలను ఉపయోగించుకోవాలని ఆలయ అధికారులు విజ్ఞప్తి చేశారు.
