జన గళం ఆంధ్రప్రదేశ్ డెస్క్: రాష్ట్రవ్యాప్తంగా పట్టణ ప్రాంతాల్లో మౌలిక వసతుల ఆధునికీకరణ లక్ష్యంగా ముఖ్యమంత్రి నారా చంద్రబాబు నాయుడు మంగళవారం 123 మున్సిపాలిటీల్లో రూ. 11,360 కోట్ల భారీ అభివృద్ధి పనులకు వర్చువల్ విధానంలో శంకుస్థాపన చేశారు. ఇందులో భాగంగా హైబ్రిడ్ యాన్యుటీ మోడల్ (HAM) విధానంలో గుడివాడ పట్టణంలో రూ. 40 కోట్లతో చేపట్టనున్న నూతన రహదారులు, సెంట్రల్ డివైడర్లు, ఆధునిక విద్యుద్దీపాలు, సుందర పార్కుల అభివృద్ధి పనులకు శ్రీకారం చుట్టారు. స్థానిక సత్యనారాయణపురంలోని ఐఎంఏ హాల్లో నిర్వహించిన ప్రత్యక్ష ప్రసారంలో గుడివాడ ఎమ్మెల్యే వెనిగండ్ల రాము, మున్సిపల్ అధికారులు, కూటమి నాయకులు పాల్గొని ముఖ్యమంత్రి ప్రసంగాన్ని వీక్షించారు. అనంతరం ఐఎంఏ హాల్ ప్రాంగణంలో శంకుస్థాపన శిలాఫలకాన్ని ఎమ్మెల్యే రాము లాంఛనంగా ఆవిష్కరించారు.
ఈ సందర్భంగా ఎమ్మెల్యే వెనిగండ్ల రాము మాట్లాడుతూ.. 90 ఏళ్ల ఘన చరిత్ర కలిగిన గుడివాడ మున్సిపాలిటీ గత పాలకుల నిర్లక్ష్యం వల్ల అధ్వానంగా మారిందని మండిపడ్డారు. గతంలో సమ్మర్ స్టోరేజ్ ట్యాంక్ కట్ట తెగితే నాలుగేళ్లు పట్టించుకోకుండా రూ. 4 కోట్ల అంచనాలు వేసి వదిలేశారని, కూటమి ప్రభుత్వం వచ్చిన వెంటనే కేవలం రూ. 13 లక్షలతో మరమ్మతులు పూర్తి చేసి తాగునీటి సమస్యను తీర్చిందని గుర్తుచేశారు. పట్టణంలో రోడ్ల సమగ్ర అభివృద్ధికి అదనంగా మరో రూ. 50 కోట్లు మంజూరు కానున్నాయని, సెప్టెంబర్ 25 నుంచి 29వ తేదీ వరకు అన్ని వార్డుల్లో ‘ఎండ్ టు ఎండ్’ రోడ్డు పనులకు శంకుస్థాపనలు చేస్తామని ప్రకటించారు. అమరావతి తరహాలోనే ఎన్టీఆర్ ప్రాతినిధ్యం వహించిన గుడివాడను మళ్లీ ప్రపంచ స్థాయి బ్రాండ్‌గా నిలపడమే తన లక్ష్యమని, ఎలాంటి లాభాపేక్ష లేకుండా పట్టణంపై ఉన్న ప్రేమతోనే ఈ పనులు చేపడుతున్నానని స్పష్టం చేశారు. ఈ కార్యక్రమంలో మున్సిపల్ కమిషనర్ సింహాద్రి మనోహర్, జనసేన ఇన్‌ఛార్జ్ బూరగడ్డ శ్రీకాంత్, కూటమి నాయకులు, ఇంజనీరింగ్ అధికారులు పెద్ద సంఖ్యలో పాల్గొన్నారు.
