రచన: మల్లికార్జున్, జన గళం నందిగామ డెస్క్: ఏళ్ల తరబడి సొంతింటి స్థలం కోసం ఎదురుచూస్తున్న నిరుపేదల ఆకాంక్షలను నెరవేరుస్తూ కూటమి ప్రభుత్వం పట్టాల పండుగకు శ్రీకారం చుట్టింది. నందిగామ పట్టణంలోని 20వ వార్డు అనాసాగరం, అలాగే 6వ వార్డు పరిధిలో అర్హులైన పేదలకు పట్టాభిషేకం కార్యక్రమంలో భాగంగా ఆంధ్రప్రదేశ్ ప్రభుత్వ విప్, నందిగామ శాసనసభ్యురాలు శ్రీమతి తంగిరాల సౌమ్య స్థానిక కూటమి నేతలతో కలిసి లబ్ధిదారుల ఇళ్లను స్వయంగా సందర్శించారు.
ఈ సందర్భంగా లబ్ధిదారుల కుటుంబాలతో ఆమె ఆత్మీయంగా ముచ్చటించారు. బుధవారం విజయవాడ నగరంలో గౌరవ ముఖ్యమంత్రి శ్రీ నారా చంద్రబాబు నాయుడు గారి చేతుల మీదుగా అర్హులైన పేదలందరికీ అధికారికంగా ఇంటి పట్టాలను అందజేయనున్నట్లు ఎమ్మెల్యే తంగిరాల సౌమ్య వెల్లడించారు. దశాబ్దాలుగా నివాస స్థలాల హక్కుల కోసం ఎదురుచూస్తున్న పేద కుటుంబాలకు కూటమి ప్రభుత్వం కొండంత అండగా నిలిచి వారి కలను నిజం చేస్తోందని పేర్కొన్నారు. రేపు సీఎం చేతుల మీదుగా పట్టాలు అందుకోబోతున్న వార్త తెలియడంతో లబ్ధిదారులు తీవ్ర భావోద్వేగానికి గురై సంతోషం వ్యక్తం చేశారు. తమ కలను నిజం చేస్తున్న ముఖ్యమంత్రి చంద్రబాబు నాయుడు, డిప్యూటీ సీఎం పవన్ కళ్యాణ్, ప్రధాని నరేంద్ర మోదీలతో పాటు స్థానిక ఎమ్మెల్యే తంగిరాల సౌమ్యకు హృదయపూర్వక కృతజ్ఞతలు తెలిపారు. పేదల సంక్షేమమే పరమావధిగా ప్రతి కుటుంబానికి సొంతింటి భరోసా కల్పించడమే కూటమి ప్రభుత్వ ప్రధాన ధ్యేయమని సౌమ్య స్పష్టం చేశారు. ఈ కార్యక్రమంలో కూటమి నాయకులు, వార్డు ప్రజలు, లబ్ధిదారులు పెద్ద సంఖ్యలో పాల్గొన్నారు.
Slug: ap-govt-whip-tangirala-sowmya-visits-nandigama-beneficiaries-cm-house-pattas-distribution