జనగళం ఎంటర్‌టైన్‌మెంట్ డెస్క్: టాలీవుడ్ చలనచిత్ర పరిశ్రమలో ఎంతోమందికి తనదైన శైలిలో అండగా నిలుస్తున్న ప్రముఖ నటుడు, జనసేనాని పవన్ కళ్యాణ్ మరోసారి తన మానవత్వాన్ని చాటుకున్నారు. సాధారణంగా కొందరు తాము చేసే సహాయాన్ని నలుగురిలో గొప్పగా చెప్పుకోవాలని ఆశపడతారు, మరికొందరు శిలాఫలకాలపై పేర్లు రాయించుకుని ఆనందిస్తారు. కానీ, నిజమైన దాతత్వం అనేది ఎవరికీ తెలియకుండా నిశ్సబ్దంగా సాగిపోతుందనడానికి పవన్ కళ్యాణ్ ఆచరణే ప్రత్యక్ష నిదర్శనంగా నిలుస్తోంది. దివంగత ప్రముఖ హాస్యనటుడు మరియు దర్శకుడు ఏవీఎస్ అనారోగ్యంతో బాధపడుతున్న సమయంలో ఆయన వైద్యం కోసం అయిన భారీ ఖర్చును పవన్ కళ్యాణ్ స్వయంగా ఎవరికీ తెలియకుండా చెల్లించిన వైనం తాజాగా వెలుగులోకి వచ్చింది.
ఏవీఎస్ కూతురు స్వయంగా ఓ ఇంటర్వ్యూలో వెల్లడించిన వివరాల ప్రకారం, నాన్న గారి లివర్ మార్పిడి మరియు ఇతర వైద్య చికిత్సల నిమిత్తం ఆసుపత్రిలో సుమారు అరవై ఐదు లక్షల రూపాయల బిల్లు అయింది. ఆ క్లిష్ట పరిస్థితిలో కుటుంబం తీవ్రమైన ఆందోళనలో ఉన్న సమయంలో, పవన్ కళ్యాణ్ ఎవరికీ ఎలాంటి ఆర్భాటం లేకుండా నేరుగా ఆసుపత్రికి వచ్చి ఆ బిల్లు పూర్తి మొత్తాన్ని చెల్లించి అక్కడి నుంచి సైలెంట్ గా వెళ్లిపోయారు. ఆ సమయంలో ఆ సహాయం చేసింది ఎవరో కూడా ఆ కుటుంబానికి వెంటనే తెలియకపోవడం విశేషం. కొన్నేళ్ల పాటు ఈ విషయం గుప్తంగానే ఉండిపోగా, ఇటీవల ఏవీఎస్ కుమార్తె స్వయంగా ఈ విషయాన్ని బయటపెట్టడంతో అందరూ ఆశ్చర్యపోయారు.
తాము చేసిన సహాయాన్ని ప్రచారం చేసుకునేందుకు ఇష్టపడని పవన్ కళ్యాణ్ నైతిక విలువలు, ఆయన విశాల హృదయం ఇండస్ట్రీ వర్గాలను ఎంతగానో కదిలిస్తున్నాయి. రాజకీయాల్లో బిజీగా ఉన్నప్పటికీ, తోటి కళాకారులకు, ఆపదలో ఉన్న కుటుంబాలకు ఆయన అందిస్తున్న సహాయ సహకారాలు ఎప్పటికీ మరువలేనివి. ఇటువంటి గొప్ప వ్యక్తిత్వం గుణమున్న నాయకుడిని ఎవరూ విమర్శించలేరని, నిజమైన ధనవంతుడు అంటే డబ్బున్నవాడు కాదని, మంచి మనసున్న వాడే అని అభిమానులు కొనియాడుతున్నారు. ఏవీఎస్ కుటుంబానికి అండగా నిలిచిన పవన్ కళ్యాణ్ శైలి తెలుగు సినీ పరిశ్రమలో మరోసారి చర్చనీయాంశంగా మారింది.
Slug: pawan-kalyan-secret-help-to-comedian-avs-family