రచన: జన గళం భీమవరం డెస్క్: జనసేన పార్టీ రాష్ట్ర సీనియర్ నాయకులు, ప్రముఖ ఆక్వా ఎగుమతి సంస్థ సూర్యమిత్ర ఎగ్జిమ్ ప్రైవేట్ లిమిటెడ్ అధినేత యిర్రంకి సూర్యారావుకు హైదరాబాద్‌లోని చిరంజీవి బ్లడ్ సెంటర్‌లో ఘన సత్కారం లభించింది. మెగా కుటుంబానికి, ప్రజా సంక్షేమానికి ఆయన అందించిన నిస్వార్థ సేవలను గుర్తిస్తూ అఖిల భారత చిరంజీవి యువత రాష్ట్ర అధ్యక్షులు రవణం స్వామినాయుడు ఆధ్వర్యంలో ఆయనను శాలువా, పూలమాలలతో ఘనంగా సత్కరించారు.
ఈ సందర్భంగా రవణం స్వామినాయుడు మాట్లాడుతూ.. కోవిడ్ విపత్కర పరిస్థితుల్లో భీమవరం ప్రాంతంలో మెగాస్టార్ చిరంజీవి పిలుపు మేరకు ‘చిరంజీవి ఆక్సిజన్ బ్యాంక్’ను బాధ్యతాయుతంగా నిర్వహించి, వేలాది మంది ప్రాణాలను కాపాడటంలో యిర్రంకి సూర్యారావు కీలక పాత్ర పోషించారని స్మరించుకున్నారు. పశ్చిమ గోదావరి జిల్లా జనసేన పార్టీ అధ్యక్షుడిగా బాధ్యతలు నిర్వర్తిస్తూ పార్టీని క్షేత్రస్థాయిలో బలోపేతం చేయడంతో పాటు డిప్యూటీ సీఎం పవన్ కళ్యాణ్‌కు నిరంతరం అండగా నిలిచారని పేర్కొన్నారు. అంతేకాకుండా సూర్యమిత్ర సంస్థ ద్వారా 500 మందికి శాశ్వత ఉద్యోగాలు, 3,000 మంది కార్మికులకు—ముఖ్యంగా గ్రామీణ మహిళలకు జీవనోపాధి కల్పిస్తూ ఆదర్శ పారిశ్రామికవేత్తగా నిలిచారని అభినందించారు. సేవ, ఉపాధి, పారిశ్రామిక రంగాల్లో ఆయన సేవలు వెలకట్టలేనివని కొనియాడారు.
