రచన: జన గళం బిజినెస్ డెస్క్: హైదరాబాద్‌లోని ప్రముఖ హైటెక్స్ వేదికగా అక్టోబర్ 14, 15 తేదీలలో అత్యంత ప్రతిష్టాత్మకంగా జరగనున్న ‘సమైఖ్య ఛాంబర్ ఆఫ్ కామర్స్ గ్లోబల్ బిజినెస్ సమ్మిట్ మీట్’ కార్యక్రమానికి పద్మవిభూషణ్, మెగాస్టార్ డాక్టర్ కొణిదెల చిరంజీవికి సాదర ఆహ్వానం అందింది. సమైఖ్య ఛాంబర్ ఆఫ్ కామర్స్ ప్రతినిధులు హైదరాబాద్‌లోని ఆయన నివాసంలో మర్యాదపూర్వకంగా కలిసి ఆహ్వాన పత్రికను అందజేసి, ఆయన ఆశీస్సులు తీసుకున్నారు.
ఈ ప్రతినిధి బృందంలో సమైఖ్య సభ్యులు పి.వి.రావు, టి.వి.ఎన్. రావు, చింతల పార్థసారథి, ఎ.వి.రత్నం మరియు అరవ రామకృష్ణ తదితరులు పాల్గొన్నారు. అంతర్జాతీయ వాణిజ్యవేత్తలు, పారిశ్రామిక ప్రముఖులు, ఔత్సాహిక పారిశ్రామికవేత్తలను ఒకే వేదికపైకి తెచ్చేందుకు హైటెక్స్‌లో నిర్వహించనున్న ఈ సదస్సు ఉద్దేశాలను, కార్యక్రమ వివరాలను మెగాస్టార్ చిరంజీవికి వారు వివరించారు. వ్యాపార రంగంలో యువతను ప్రోత్సహించేలా, పారిశ్రామిక అభివృద్ధికి ఊతమిచ్చేలా ఈ సమ్మిట్‌ను రూపొందించడంపై చిరంజీవి హర్షం వ్యక్తం చేస్తూ కార్యక్రమం ఘన విజయం సాధించాలని నిర్వాహక బృందానికి శుభాకాంక్షలు తెలిపారు.
