రచన: జన గళం పెనమలూరు డెస్క్: కృష్ణా జిల్లా పెనమలూరు గ్రామ పరిధిలోని 853 మంది రైతులకు అధికారిక రాజముద్రతో కూడిన నూతన పట్టాదారు పాస్ పుస్తకాలను స్థానిక శాసనసభ్యులు బోడె ప్రసాద్ స్వయంగా అందజేశారు. రైతుల భూములకు సంబంధించిన హక్కులు, విస్తీర్ణం వివరాలు అధికారికంగా పక్కాగా నమోదై ఉండటం అన్నదాతలకు అసలైన భరోసాను కల్పిస్తుందని, భూ రికార్డుల్లో పూర్తి పారదర్శకతను తీసుకురావడమే కూటమి ప్రభుత్వ ప్రధాన లక్ష్యమని ఈ సందర్భంగా ఆయన పేర్కొన్నారు.
గత వైసీపీ ప్రభుత్వ హయాంలో రైతుల అధికారిక పాస్ పుస్తకాలపై రాజకీయ నాయకుల వ్యక్తిగత చిత్రాలను ముద్రించి రైతుల ఆత్మగౌరవాన్ని దెబ్బతీశారని ఎమ్మెల్యే బోడె ప్రసాద్ విమర్శించారు. కూటమి ప్రభుత్వం అధికారంలోకి వచ్చిన వెంటనే వ్యక్తిగత ప్రచారాలకు స్వస్తి పలికి, భారత అధికారిక రాజముద్రతో పత్రాలను ముద్రించి అన్నదాతలకు పంపిణీ చేస్తున్నామని తెలిపారు. రీ-సర్వే ద్వారా భూమి వివరాలు పక్కాగా రికార్డుల్లో నమోదు కావడం వల్ల భవిష్యత్తులో భూ వివాదాలకు ఆస్కారం ఉండదన్నారు. కొనుగోళ్లు, అమ్మకాల సమయంలో రెవెన్యూ, రిజిస్ట్రేషన్ శాఖల సమన్వయంతో నిబంధనల ప్రకారం వేగంగా ప్రక్రియ పూర్తవుతుందని వివరించారు. ఈ కార్యక్రమంలో కూటమి నాయకులు, రెవెన్యూ అధికారులు, సిబ్బంది మరియు పెద్ద సంఖ్యలో రైతులు పాల్గొన్నారు.
