రచన: జన గళం బ్యూరో, విజయవాడ: భారత చైతన్య యువజన పార్టీ (బీసీవై పార్టీ) రాష్ట్ర సమన్వయ కమిటీ ఆధ్వర్యంలో ఉమ్మడి గుంటూరు, కృష్ణా జిల్లాల్లో చేపట్టిన విస్తృత పర్యటన విజయవంతంగా పూర్తయింది. మంగళగిరి, మచిలీపట్నం ప్రధాన కేంద్రాలుగా నిర్వహించిన రెండు కీలక ప్రాంతీయ సమావేశాలకు పార్టీ కమిటీ సభ్యులు, నియోజకవర్గ నాయకులు మరియు క్రియాశీలక కార్యకర్తలు భారీ ఎత్తున తరలివచ్చారు. రాష్ట్రంలో త్వరలో జరగనున్న స్థానిక సంస్థల ఎన్నికలను అత్యంత ప్రతిష్టాత్మకంగా తీసుకుని బరిలోకి దిగేందుకు సిద్ధంగా ఉన్నామని క్షేత్రస్థాయి నాయకులు, శ్రేణులు రాష్ట్ర సమన్వయ కమిటీకి తమ సంసిద్ధతను స్పష్టం చేశారు.
ప్రజా సమస్యలపై రామచంద్ర యాదవ్ నాయకత్వంలో బీసీవై పార్టీ నిరంతరం సాగిస్తున్న రాజీలేని పోరాటాలకు ఆకర్షితులై ఉమ్మడి జిల్లాల పరిధిలోని వివిధ పార్టీల నుంచి ముఖ్య నేతలు, యువజనులు పెద్ద ఎత్తున బీసీవై పార్టీలో చేరారు. ఈ సదస్సుల్లో ముఖ్యంగా మహిళా లోకం నుంచి అనూహ్య స్పందన వ్యక్తమైంది. మహిళా సాధికారత, నాయకత్వానికి పెద్దపీట వేస్తున్న ఏకైక వేదికగా బీసీవై పార్టీకి లభిస్తున్న ప్రజాదరణ ఆంధ్రప్రదేశ్ రాజకీయాల్లో సరికొత్త మార్పునకు సంకేతమని సమన్వయ కమిటీ సభ్యులు ఉద్ఘాటించారు. రాబోయే ఎన్నికల్లో పూర్తిస్థాయి బలంతో ప్రజల్లోకి వెళ్లాలని పార్టీ శ్రేణులకు దిశానిర్దేశం చేశారు.
Slug: bcy-party-guntur-krishna-districts-state-coordination-committee-tour-grand-success-local-body-elections