జన గళం విజయవాడ బ్యూరో: విజయవాడ ఇంద్రకీలాద్రిపై కొలువుదీరిన జగన్మాత శ్రీ దుర్గామల్లేశ్వర స్వామి వార్ల దేవస్థానంలో అత్యంత వైభవంగా జరగనున్న “దసరా మహోత్సవములు 2026” అధికారిక శుభ ఆహ్వాన పత్రికను ప్రముఖ శ్రీ దాసాంజనేయ స్వామి వారి దేవస్థానం పాలకమండలి చైర్మన్ శ్రీ సోడిశెట్టి కృష్ణ ప్రసాద్‌కు అందజేశారు. మంగళవారం దాసాంజనేయ స్వామి ఆలయ ప్రాంగణంలో పద్మావతి అజయవర్మ ఠాగూర్ మర్యాదపూర్వకంగా విచ్చేసి, చైర్మన్ సోడిశెట్టి కృష్ణప్రసాద్‌తో పాటు ఆలయ కార్యనిర్వహణాధికారి (ఈవో) పి. లోకేశ్వరిలకు దసరా శరన్నవరాత్రి మహోత్సవాల ఆహ్వాన పత్రికను అందజేశారు.
ఈ సందర్భంగా పద్మావతి అజయవర్మ ఠాగూర్ మాట్లాడుతూ.. ఇంద్రకీలాద్రిపై శరన్నవరాత్రుల వేళ కనకదుర్గమ్మ వారు విశేష అలంకారాలలో భక్తులకు దర్శనమిస్తారని, రాష్ట్రవ్యాప్తంగా నలుమూలల నుంచి తరలివచ్చే భక్తులకు ఎలాంటి అసౌకర్యం కలగకుండా విస్తృత ఏర్పాట్లు జరుగుతున్నాయని వివరించారు. ఈ పవిత్ర దసరా వేడుకలకు దాసాంజనేయ స్వామి ఆలయ పాలకమండలి సభ్యులు, భక్తులు పెద్ద సంఖ్యలో విచ్చేసి అమ్మవారి దివ్య కృపాకటాక్షాలు పొందాలని కోరారు. ఆహ్వాన పత్రికను స్వీకరించిన అనంతరం చైర్మన్ సోడిశెట్టి కృష్ణప్రసాద్, ఈవో పి. లోకేశ్వరిలు మాట్లాడుతూ.. ఇంద్రకీలాద్రిపై జరిగే దసరా వేడుకలు విజయవంతం కావాలని ఆకాంక్షిస్తూ ప్రత్యేక ధన్యవాదాలు తెలిపారు.
ఈ కార్యక్రమంలో శ్రీ దాసాంజనేయ స్వామి దేవస్థానం ధర్మకర్తల మండలి సభ్యులు వెంకటేశ్వరరావు, లబ్బ దుర్గ, పరసా భాగ్యలక్ష్మి, ధనలక్ష్మితో పాటు ఇ. సుగుణబాబు, కిషోర్ తదితరులు పాల్గొన్నారు.