జన గళం విజయవాడ బ్యూరో: పార్టీ ఆవిర్భావం నాటి నుంచి క్షేత్రస్థాయిలో పార్టీ జెండాను మోస్తూ నిస్వార్థంగా సేవలందిస్తున్న అట్టడుగు వర్గాల కార్యకర్తలకు ఆర్థిక తోడ్పాటు అందించే లక్ష్యంతో జనసేన పార్టీ విజయవాడ వేదికగా బృహత్తర సంక్షేమ కార్యక్రమానికి శ్రీకారం చుట్టింది. పార్టీ కోసం చెమటోడుస్తున్న ఆటో కార్మికులకు నూతన ఆటోలు, చిరు వ్యాపారస్తులకు తోపుడు బండ్లు, వీర మహిళల స్వయం ఉపాధి సాధికారత కోసం కుట్టుమిషన్ల పంపిణీతో పాటు పలు పార్టీల నుంచి కీలక నాయకుల భారీ చేరికల సభను అక్టోబర్ 7, బుధవారం ఉదయం 8:00 గంటలకు నగరంలోని ‘సుజనా ది వేన్యూ కన్వెన్షన్’ హాల్‌లో నిర్వహించనున్నారు.
ఈ మహోత్సవానికి ముఖ్య అతిథులుగా శాసనమండలి సభ్యులు, ఏపీ గ్రీన్ ఎగ్జిక్యూటివ్ కమిటీ చైర్మన్ శ్రీ కొణిదెల నాగబాబు, పార్టీ రాష్ట్ర ప్రధాన కార్యదర్శి శ్రీ తాళ్లూరి రామ్, ఎన్టీఆర్ జిల్లా అధ్యక్షులు శ్రీ సామినేని ఉదయభాను హాజరుకానున్నారు. విశిష్ట అతిథులుగా మంగళగిరి నియోజకవర్గ ఇన్‌చార్జ్ & ఏపీఎంఎస్‌ఐడీసీ చైర్మన్ చిల్లపల్లి శ్రీనివాసరావు, ఏపీ పోలీస్ హౌసింగ్ కార్పొరేషన్ చైర్మన్ కళ్యాణం శివ శ్రీనివాస్ (కేకే), జనసేన పార్టీ రాష్ట్ర కార్యదర్శి & ఏపీఐఐసీ డైరెక్టర్ మండలి రాజేష్, సీనియర్ నాయకులు పెనుగొండ సుబ్బారాయుడు తదితరులు పాల్గొంటారు. ఈ సందర్భంగా పలువురు సీనియర్ నాయకులు, ఇతర పార్టీల ముఖ్య ప్రజాప్రతినిధులు నాగబాబు సమక్షంలో జనసేన తీర్థం పుచ్చుకోనున్నారు. ఈ కార్యక్రమాన్ని విజయవంతం చేసేందుకు విజయవాడ పార్లమెంట్ పరిధిలోని తూర్పు, సెంట్రల్, పశ్చిమ నియోజకవర్గాల కమిటీలు, కార్పొరేటర్లు, రీజినల్ కోఆర్డినేటర్లు, లీగల్ సెల్ సభ్యులు, వీర మహిళలు మరియు జనసైనికులు కదలిరావాలని పార్టీ రాష్ట్ర కార్యదర్శి, విజయవాడ పార్లమెంట్ సమన్వయకర్త అమ్మిశెట్టి వాసు పిలుపునిచ్చారు.
