జన గళం క్రైమ్ డెస్క్: కడప జిల్లా ప్రొద్దుటూరులో ప్రజల ఆరోగ్యంతో చెలగాటమాడుతున్న కల్తీ దందాలు మరోసారి బట్టబయలయ్యాయి. ఇతర రాష్ట్రాల నుంచి తక్కువ ధరలకు ముడి ధనియాలను ప్రొద్దుటూరుకు తరలించి, వాటికి హానికరమైన కెమికల్స్ కలిపి ధనియాల పొడిగా మారుస్తున్న అక్రమ ప్రాసెసింగ్ యూనిట్లపై విజిలెన్స్ అధికారులు బుధవారం ఆకస్మిక దాడులు నిర్వహించారు. ఈ తనిఖీల్లో భారీ ఎత్తున కల్తీ సరుకును స్వాధీనం చేసుకుని, నిర్వాహకులపై కేసులు నమోదు చేయడం స్థానికంగా సంచలనం సృష్టించింది.
ప్రొద్దుటూరులోని మండి బజార్ ప్రాంతంలో ఉన్న జ్యోతి ప్రాసెసింగ్ యూనిట్‌లో ఈ కల్తీ తంతు యథేచ్ఛగా సాగుతున్నట్లు విజిలెన్స్ అధికారులకు పక్కా సమాచారం అదందింది. దీంతో రంగంలోకి దిగిన అధికారులు ఆ యూనిట్‌పై ఆకస్మికంగా దాడులు చేసి పరిశీలించారు. నిబంధనలకు విరుద్ధంగా ముడి ధనియాలకు రసాయనాలు కలుపుతూ ప్రజల ఆరోగ్యానికి హాని కలిగించేలా పొడి తయారు చేస్తున్నట్లు గుర్తించారు. ఈ సోదాల్లో సుమారు రూ. 1.48 కోట్ల విలువైన ధనియాలు మరియు ప్రాసెసింగ్ సామగ్రిని అధికారులు స్వాధీనం చేసుకున్నారు.
ఈ అక్రమ దందాతో సంబంధం ఉన్న గాజులపల్లి రమేశ్ మరియు వినయ్‌పై విజిలెన్స్ అధికారులు కేసులు నమోదు చేసి దర్యాప్తు ముమ్మరం చేశారు. ప్రజల ప్రాణాలను పణంగా పెట్టి, లాభాల కోసం ఇటువంటి ప్రమాదకరమైన కల్తీ కార్యకలాపాలకు పాల్పడితే ఎంతటివారైనా ఉపేక్షించేది లేదని అధికారులు హెచ్చరించారు. ప్రొద్దుటూరు పరిసర ప్రాంతాల్లోని ఇతర ప్రాసెసింగ్ యూనిట్లపై కూడా నిఘా మరింత కఠినతరం చేస్తామని, ప్రజలు ఆహార పదార్థాల కొనుగోలులో అప్రమత్తంగా ఉండాలని సూచించారు.
Slug: proddatur-coriander-powder-adulteration-vigilance-raids