జన గళం సామాజిక విశ్లేషణ బ్యూరో: జగద్గురు శ్రీ పోతులూరి వీరబ్రహ్మేంద్రస్వామి అంటే కేవలం భవిష్యత్తును చెప్పిన ‘కాలజ్ఞానం’ మాత్రమే కాదని, ఆయన ఒక కులానికో లేదా సంఘాల బ్యానర్లకో పరిమితమైన వ్యక్తి అంతకంటే కాదని సమాజం గుర్తించాల్సిన సమయం ఆసన్నమైంది. నాటి సమాజంలో నెలకొన్న మూఢనమ్మకాలు, కుల వివక్షను రూపుమాపేందుకు ఆయన అందించిన “కాళికాంబ సప్తశతి” ఒక గొప్ప సామాజిక విప్లవ గ్రంథం. “అన్నమయములైనవన్ని జీవంబులు.. కూడు లేక జీవకోటి లేదు.. కూడు తినేడి కాడ కులభేద మేలకో కాళికాంబ! హంస! కాళికాంబ!” అంటూ ఆకలికి కులం లేదని, అన్నం తినే పంక్తిలో భేదాలు చూపడం అమానుషమని శతాబ్దాల క్రితమే బ్రహ్మంగారు సమాజాన్ని నిలదీశారు.
అయితే నేటి ఆధునిక యుగంలోనూ మన పల్లెల్లో పెళ్లిళ్లు, గృహప్రవేశాలు, శుభకార్యాల సమయంలో భోజనాల వద్ద పంక్తి భేదాల వివక్ష కొనసాగుతుండటం శోచనీయం. ఒక కులం వారికి లోపల, మరొక కులం వారికి బయట లేదా వేరే చోట భోజనాలు వడ్డించే అనాగరిక విధానాలు ఇప్పటికీ దర్శనమిస్తున్నాయి. అన్నం పరబ్రహ్మ స్వరూపమని నమ్మే నేలపై, అదే అన్నం తినే చోట కుల వివక్ష చూపడం సభ్య సమాజానికి గొడ్డలిపెట్టు. బ్రహ్మంగారు ప్రబోధించిన సమానత్వ సిద్ధాంతాన్ని కేవలం చదవడం కాకుండా ప్రతి ఒక్కరూ నిత్య జీవితంలో ఆచరణలో పెట్టినప్పుడే సమసమాజ నిర్మాణం సాధ్యమవుతుంది. మన ఆలోచనా విధానంలో మార్పు వచ్చినప్పుడే సమాజంలో నిజమైన మార్పు వస్తుంది.
