జన గళం కాకినాడ/రాజమండ్రి బ్యూరో: ఆంధ్రప్రదేశ్‌లో స్థానిక సంస్థల ఎన్నికల సన్నద్ధతను జనసేన పార్టీ మరింత వేగవంతం చేసింది. ఇందులో భాగంగా పార్టీకి అత్యంత బలమైన పట్టున్న ఉమ్మడి విశాఖ, గోదావరి జిల్లాల పరిధిలోని అనకాపల్లి, కాకినాడ, అమలాపురం, రాజమండ్రి పార్లమెంట్ నియోజకవర్గాలకు స్థానిక సంస్థల ఎన్నికల కో-ఆర్డినేషన్ అడ్‌హాక్ కమిటీలు పూర్తిస్థాయిలో రంగంలోకి దిగాయి. అనకాపల్లి పార్లమెంట్‌కు ఎమ్మెల్యే వంశీకృష్ణ శ్రీనివాస్ యాదవ్ సమన్వయకర్తగా వ్యవహరిస్తుండగా, గోదావరి జిల్లాల పరిధిలోని కాకినాడ, అమలాపురం, రాజమండ్రి పార్లమెంట్ స్థానాలకు సీనియర్ నేతలతో కూడిన సమన్వయ బృందాలను రంగంలోకి దించారు.
క్షేత్రస్థాయిలో పార్టీ కేడర్ పరిస్థితి, ఆశావాహుల వివరాల సేకరణ, వార్డులు, పంచాయతీలు, మండలాల్లో గెలుపు గుర్రాలను గుర్తించే బాధ్యతలను ఈ కమిటీలకు అప్పగించారు. కూటమి పార్టీలైన టీడీపీ, బీజేపీలతో క్షేత్రస్థాయి సమన్వయం చేసుకుంటూనే, స్థానిక సంస్థల్లో 100 శాతం స్ట్రైక్ రేట్ సాధించడమే లక్ష్యంగా ప్రణాళికలు రచిస్తున్నారు. త్వరలోనే ఈ పార్లమెంట్ కమిటీలతో పార్టీ అధినేత, ఉప ముఖ్యమంత్రి పవన్ కళ్యాణ్ స్వయంగా సమావేశమై క్షేత్రస్థాయి నివేదికలను సమీక్షించి అభ్యర్థుల ఎంపికపై తుది మార్గదర్శనం చేయనున్నారు.
