జన గళం తిరుపతి/అమరావతి డెస్క్: గ్రామీణ రహదారుల రూపురేఖలు మార్చేందుకు కూటమి ప్రభుత్వం అత్యంత ప్రతిష్టాత్మకంగా చేపట్టిన ‘పల్లెపండుగ’ కార్యక్రమం కింద నిర్మించిన నూతన రోడ్డును దుండగులు ట్రాక్టర్‌తో ధ్వంసం చేసిన ఘటనపై రాష్ట్ర ఉప ముఖ్యమంత్రి, పంచాయతీరాజ్ గ్రామీణాభివృద్ధి శాఖ మంత్రి శ్రీ పవన్ కళ్యాణ్ గారు తీవ్రస్థాయిలో మండిపడ్డారు. తిరుపతి జిల్లా పుల్లంపేట మండల పరిధిలోని అనంతసముద్రం – పాపక్కగారిపల్లె గ్రామాల మధ్య సుమారు రూ.4.75 కోట్ల వ్యయంతో ప్రజల రాకపోకల కోసం కొత్తగా నిర్మించిన తారు రోడ్డును కొందరు వ్యక్తులు ఉద్దేశపూర్వకంగా 100 మీటర్ల మేర ట్రాక్టర్‌తో దున్నేసి ధ్వంసం చేశారు.
ఈ దుశ్చర్యపై తీవ్ర ఆగ్రహం వ్యక్తం చేసిన పవన్ కళ్యాణ్ గారు, ప్రజాధనంతో నిర్మించిన ప్రభుత్వ ఆస్తులను ధ్వంసం చేస్తే చూస్తూ ఊరుకునే ప్రసక్తే లేదని హెచ్చరించారు. ఈ ఘటనకు బాధ్యులైన వారిపై నాన్-బెయిలబుల్ సెక్షన్ల కింద కేసులు నమోదు చేయాలని పోలీసు, రెవెన్యూ ఉన్నతాధికారులను ఆదేశించారు. డిప్యూటీ సీఎం ఆదేశాలతో పోలీసులు ఇప్పటికే ఎఫ్‌ఐఆర్ నమోదు చేసి దర్యాప్తు ముమ్మరం చేశారు. అంతేకాకుండా, రోడ్డు ధ్వంసంతో ప్రభుత్వానికి జరిగిన ఆర్థిక నష్టాన్ని నిందితుల నుంచే ‘రెవెన్యూ రికవరీ యాక్ట్’ (ఆర్ఆర్ యాక్ట్) కింద కచ్చితంగా వసూలు చేయాలని స్పష్టం చేశారు. గ్రామీణ ప్రాంతాల అభివృద్ధిని అడ్డుకుంటూ అసాంఘిక శక్తులు చేసే ఇలాంటి ఆగడాలను కూటమి ప్రభుత్వం ఉక్కుపాదంతో అణచివేస్తుందని, ప్రభుత్వ ఆస్తులకు నష్టం కలిగిస్తే తీవ్ర పరిణామాలు తప్పవని పవన్ కళ్యాణ్ హెచ్చరించారు.
