జన గళం మచిలీపట్నం డెస్క్: ఆంధ్రప్రదేశ్ పంచాయతీరాజ్, స్థానిక సంస్థల ఎన్నికల సమరంలో కృష్ణా జిల్లా పరిషత్ చైర్‌పర్సన్ పీఠం ఎంపిక రాజకీయ వర్గాల్లో తీవ్ర ఆసక్తిని రేకెత్తిస్తోంది. జిల్లా పరిషత్ చైర్‌పర్సన్ స్థానం ఈసారి మహిళకు కేటాయించబడిన నేపథ్యంలో, కూటమి తరఫున తెలుగుదేశం పార్టీ నుంచి శ్రీమతి విజయలక్ష్మి బూరగడ్డ గారి పేరును పార్టీ అధిష్టానం పరిశీలిస్తున్నట్లు సమాచారం.
ఆంధ్రప్రదేశ్ శాసనసభ మాజీ ఉపసభాపతి, రెండు పర్యాయాలు ఎమ్మెల్యేగా సేవలందించిన సీనియర్ నేత శ్రీ బూరగడ్డ వేదవ్యాస్ గారి సతీమణి అయిన విజయలక్ష్మి గారు ఉన్నత విద్యావంతురాలు. ఆమె శ్రీ వేంకటేశ్వర విశ్వవిద్యాలయం నుంచి సోషియాలజీలో ఎం.ఏ. పట్టా పొందారు. 1989 నుంచి 2014 వరకు సుదీర్ఘ కాలం పాటు బూరగడ్డ వేదవ్యాస్ గారి రాజకీయ ప్రస్థానంలో తోడుగా నిలుస్తూ, పెడన, మచిలీపట్నం పరిసర ప్రాంతాల ప్రజలతో, స్థానిక మహిళా సంఘాలతో విశేష అనుబంధాన్ని కొనసాగిస్తున్నారు. ఆమెకున్న ఉన్నత విద్యార్హతలు, బలమైన రాజకీయ కుటుంబ నేపథ్యం, క్షేత్రస్థాయిలో ప్రజలతో ఉన్న సుదీర్ఘ సంబంధాలు ఆమె అభ్యర్థిత్వానికి అనుకూలంగా మారినట్లు తెలుస్తోంది. పార్టీ అధిష్టానం అధికారిక ప్రకటన చేయాల్సి ఉన్నప్పటికీ, కృష్ణా జడ్పీ పీఠం బరిలో ఆమె పేరు ప్రముఖంగా వినపడుతుండటంతో జిల్లా రాజకీయాల్లో ఈ పరిణామం ప్రాధాన్యత సంతరించుకుంది.
