జన గళం నూజివీడు బ్యూరో: ఆంధ్రప్రదేశ్‌లో రాబోయే స్థానిక సంస్థలు, మున్సిపల్ ఎన్నికల సన్నాహకాల్లో భాగంగా జనసేన పార్టీ తన క్షేత్రస్థాయి యంత్రాంగాన్ని ముమ్మరం చేసింది. పార్టీ అధ్యక్షులు, ఉప ముఖ్యమంత్రి పవన్ కళ్యాణ్ ఆదేశాల మేరకు ఏలూరు పార్లమెంట్ పరిధిలోని నూజివీడు అసెంబ్లీ నియోజకవర్గ స్థానిక ఎన్నికల సమన్వయకర్తగా జనసేన సీనియర్ నాయకుడు పాశం నాగబాబు నియమితులయ్యారు. ఈ సందర్భంగా రాష్ట్ర సమాచార పౌరసంబంధాలు, గృహనిర్మాణ శాఖ మంత్రి కొలుసు పార్థసారథి గారితో పాటు జనసేన, టీడీపీ, బీజేపీ కూటమి ముఖ్య నాయకులు నాగబాబుకు ప్రత్యేక అభినందనలు తెలిపారు. తనపై విశ్వాసంతో గురుతర బాధ్యతను అప్పగించిన ఉప ముఖ్యమంత్రి పవన్ కళ్యాణ్, పార్టీ రాజకీయ వ్యవహారాల కమిటీ చైర్మన్ నాదెండ్ల మనోహర్‌లకు పాశం నాగబాబు హృదయపూర్వక కృతజ్ఞతలు తెలియజేశారు. నూజివీడు నియోజకవర్గంలో కమిటీ సభ్యులతో సమన్వయం చేసుకుంటూ, స్థానిక సంస్థల ఎన్నికల్లో కూటమి అభ్యర్థుల సంపూర్ణ విజయానికి అంకితభావంతో పనిచేస్తానని ఆయన స్పష్టం చేశారు.
నూజివీడు జనసేన స్థానిక ఎన్నికల సమన్వయకర్తగా పాశం నాగబాబు: అభినందించిన మంత్రి పార్థసారథి, కూటమి నేతలు!
