జన గళం ఆంధ్రప్రదేశ్ డెస్క్: రాబోయే గోదావరి పుష్కరాల నాటికి ప్రయాణికులకు ఎలాంటి ట్రాఫిక్ సమస్యలు తలెత్తకుండా మరియు ప్రమాదాలు జరగకుండా కూటమి ప్రభుత్వం ముందస్తు ప్రణాళికలతో ముందుకు సాగుతోంది. ఇందులో భాగంగా రాజమహేంద్రవరం గ్రామీణ శాసనసభ్యులు గోరంట్ల బుచ్చయ్య చౌదరి జాతీయ రహదారుల విభాగం ప్రాజెక్ట్ డైరెక్టర్ కృష్ణమూర్తితో కలిసి క్షేత్రస్థాయిలో పరిశీలన జరిపారు. మోరంపూడి నుంచి పొట్టిలంక వరకు ఉన్న జాతీయ రహదారిపై పలు కీలక ప్రాంతాలను వారు పరిశీలించి, ప్రయాణానికి అనుకూలంగా ఉండేలా తక్షణ చర్యలు తీసుకోవాలని అధికారులను ఆదేశించారు. పుష్కరాల సమయంలో వచ్చే విపరీతమైన రద్దీని దృష్టిలో ఉంచుకుని ఇప్పటి నుంచే రోడ్ల విస్తరణపై దృష్టి సారించినట్లు ఆయన తెలిపారు.
ఈ తనిఖీల సందర్భంగా రహదారి వెంబడి ఉన్న డ్రైనేజీ వ్యవస్థను మరింత పొడిగించాలని, పలు ప్రాంతాల్లో ఉన్న అక్రమణలను తక్షణమే తొలగించాలని నేషనల్ హైవేస్ అథారిటీ అధికారులను ఎమ్మెల్యే గోరంట్ల బుచ్చయ్య చౌదరి కోరారు. అలాగే సర్వీస్ రోడ్లను వెడల్పు చేయడం ద్వారా స్థానిక ట్రాఫిక్ ఇబ్బందులను పూర్తిగా నివారించవచ్చని సూచించారు. పుష్కరాలకు లక్షలాదిగా భక్తులు తరలివచ్చే అవకాశం ఉన్నందున ఎలాంటి అవాంఛనీయ ఘటనలు జరగకుండా పటిష్టమైన రవాణా ఏర్పాట్లు ఉండేలా ముందుగానే ఇంజనీరింగ్ పరమైన లోపాలను సవరించాలని అధికారులకు స్పష్టం చేశారు.
ప్రభుత్వ లక్ష్యానికి అనుగుణంగా అధికారులంతా సమన్వయంతో పనిచేసి పనులను నిర్ణీత గడువులోగా పూర్తి చేయాలని ఎమ్మెల్యే సూచించారు. రహదారి ప్రమాదాల నివారణే ధ్యేయంగా అవసరమైన చోట తగిన భద్రతా చర్యలు చేపట్టాలని కోరారు. కూటమి ప్రభుత్వం ప్రజల సౌకర్యార్థం మౌలిక వసతుల కల్పనకు అత్యధిక ప్రాధాన్యత ఇస్తోందని, పుష్కరాల నాటికి నియోజకవర్గంలోని అన్ని ప్రధాన రహదారులను సర్వాంగ సుందరంగా తీర్చిదిద్దుతామని ధీమా వ్యక్తం చేశారు.
Slug: godavari-pushkaralu-rajahmundry-nh-inspection-mla-gorantla-butchaiah-chowdary