రచన: జన గళం కృత్తివెన్ను/పెడన డెస్క్: దేశ ప్రధాని నరేంద్ర మోదీ ప్రజా జీవితంలో 25 సంవత్సరాల సుపరిపాలన పూర్తి చేసుకున్న చారిత్రక ఘట్టాన్ని పురస్కరించుకుని చేపట్టిన ‘సేవా సంకల్ప అభియాన్’ కార్యక్రమం పెడన నియోజకవర్గంలో ఘనంగా కొనసాగుతోంది. 13 సంవత్సరాలు గుజరాత్ ముఖ్యమంత్రిగా, 12 సంవత్సరాలు భారత ప్రధానిగా దేశాన్ని అన్ని రంగాల్లో ప్రగతి పథంలో నడిపిస్తున్న మోదీ నిస్వార్థ సేవలకు గుర్తింపుగా.. క్షేత్రస్థాయిలో నిరంతరం సేవలందిస్తున్న అంగన్‌వాడీ కార్యకర్తలను గౌరవించే కార్యక్రమానికి శ్రీకారం చుట్టారు. ఇందులో భాగంగా కృష్ణా జిల్లా కృత్తివెన్ను మండల పరిధిలోని ఎండపల్లి, గాంధీనగరం గ్రామాల్లో అంగన్‌వాడీ కేంద్రాలలో విధులు నిర్వర్తిస్తున్న టీచర్లు, ఆయాలను గ్రామస్తులు, కూటమి శ్రేణులు శనివారం శాలువాలతో ఘనంగా సత్కరించారు.
ఈ సందర్భంగా కూటమి నాయకులు మాట్లాడుతూ.. కేంద్రంలో ప్రధాని నరేంద్ర మోదీ, రాష్ట్రంలో ముఖ్యమంత్రి నారా చంద్రబాబు నాయుడు, ఉప ముఖ్యమంత్రి కొణిదెల పవన్ కళ్యాణ్ త్రయం నేతృత్వంలోని ఎన్డీయే కూటమి ప్రభుత్వం సంక్షేమం, అభివృద్ధిని సమపాళ్లలో ముందుకు తీసుకెళ్తోందని కొనియాడారు. పెడన నియోజకవర్గంలో శాసనసభ్యులు కాగిత కృష్ణప్రసాద్, మచిలీపట్నం ఎంపీ వల్లభనేని బాలశౌరిల సమన్వయంతో నియోజకవర్గం అభివృద్ధి పథంలో దూసుకుపోతోందని స్పష్టం చేశారు. సమాజంలో చిన్నారులు, గర్భిణులకు పౌష్టికాహారం, ప్రాథమిక విద్యా సంరక్షణ అందిస్తున్న అంగన్‌వాడీ సిబ్బంది సేవలు వెలకట్టలేనివని ప్రశంసించారు. ఈ కార్యక్రమంలో అంగన్‌వాడీ లబ్ధిదారులు, గ్రామ పెద్దలు, కూటమి నాయకులు, సచివాలయ అధికారులు, సిబ్బంది పెద్ద సంఖ్యలో పాల్గొని అంగన్‌వాడీ కార్యకర్తలను అభినందించారు.
