జన గళం అరకు/డుంబ్రిగూడ బ్యూరో: అల్లూరి సీతారామరాజు జిల్లా డుంబ్రిగూడ మండలం కొర్రాయి పంచాయతీ పరిధిలోని గతరాజిల్లెడ రెవెన్యూ పరిధి బల్లుగూడ గ్రామంలో శ్మశానవాటిక మట్టి రోడ్డు అభివృద్ధి పనులకు సోమవారం (05-10-2026) ఘనంగా శంకుస్థాపన కార్యక్రమం నిర్వహించారు. కేంద్ర ప్రభుత్వం ప్రవేశపెట్టిన వీబీ-జీ రామ్-జీ (VB-G RAM-G) పథకం ద్వారా మంజూరైన రూ. 6 లక్షల వ్యయంతో చేపట్టనున్న ఈ రోడ్డు పనులకు ప్రజాప్రతినిధులు, కూటమి నాయకులు కొబ్బరికాయ కొట్టి లాంఛనంగా ప్రారంభించారు.
ఈ కార్యక్రమానికి ఫీల్డ్ అసిస్టెంట్ కిల్లో ప్రకాష్, స్థానిక సర్పంచ్ పూజారి కొమ్ములు, అరకు వ్యాలీ నియోజకవర్గ ఎస్టీ సెల్ అధ్యక్షుడు బురిడి కొములు నాయుడు, జనసేన ఉమ్మడి జిల్లా ప్రధాన కార్యదర్శి కోనేడి లక్ష్మణ్ రావు, కొర్రాయి పంచాయతీ టీడీపీ ప్రధాన కార్యదర్శి కొర్ర దామోదర్, డుంబ్రిగూడ మండలం టీడీపీ క్లస్టర్ ఇన్‌ఛార్జ్ కొర్ర నాగరాజు, మార్కెటింగ్ డైరెక్టర్ గెమ్మెలి రామి, కితలంగి టీడీపీ యూనిట్ ఇన్‌ఛార్జ్ జి. దామోదర్ ముఖ్య అతిథులుగా హాజరయ్యారు. బల్లుగూడ గ్రామ ప్రజల చిరకాల అవసరమైన శ్మశానవాటిక రోడ్డుకు రూ. 6 లక్షల నిధులు కేటాయించినందుకు పెసా కార్యదర్శి కొర్ర రాంబాబు కూటమి ప్రభుత్వానికి, అధికారులకు ప్రత్యేక ధన్యవాదాలు తెలిపారు. ఈ కార్యక్రమంలో గ్రామ పెద్ద కొర్ర పండన్న, ఆశా కార్యకర్త కొర్ర గాయత్రి, అంగన్వాడీ కార్యకర్త కొర్ర రంభ మరియు స్థానిక గిరిజన ప్రజలు, మహిళలు పెద్ద ఎత్తున పాల్గొన్నారు.
