జన గళం తిరువూరు/ఎన్టీఆర్ జిల్లా బ్యూరో: డాక్టర్ బాబాసాహెబ్ అంబేద్కర్ రచించిన రాజ్యాంగం కల్పించిన హక్కులతో ప్రజాస్వామ్యబద్ధంగా ఎన్నికైన ప్రజాప్రతినిధిపై కుల వివక్ష చూపడం, అవమానించే ధోరణి ప్రదర్శించడం సభ్యసమాజం తలదించుకోవాల్సిన విషయమని తిరువూరు నియోజకవర్గ ప్రజలు, ప్రజాసంఘాలు తీవ్ర ఆగ్రహం వ్యక్తం చేస్తున్నాయి. ఎస్సీ రిజర్వ్‌డ్ నియోజకవర్గమైన తిరువూరులో స్థానిక శాసనసభ్యులు కొలికపూడి శ్రీనివాసరావుపై కొంతమంది కద్దరు నాయకులు పెత్తనం చెలాయించాలని చూడటం, దౌర్జన్యపూరిత వైఖరి అవలంబించడంపై సామాజిక కార్యకర్త ప్రొద్దుటూరి కృష్ణ తీవ్రస్థాయిలో ధ్వజమెత్తారు.
ఈ సందర్భంగా ఆయన మాట్లాడుతూ.. పదవులు మారినా, కాలాలు మారినా కొంతమందిలో ఇంకా అగ్రకుల అహంకార మనస్తత్వాలు మారకపోవడం దారుణమన్నారు. ఒక దళిత బిడ్డ ప్రజాబలంతో గెలిచి చట్టసభ సభ్యుడైనా కనీస గౌరవం ఇవ్వలేని ఈ వివక్షాపూరిత వైఖరి మానవత్వానికే మచ్చ అని పేర్కొన్నారు. “తలపాగా చుట్టడమే కాదు.. నియోజకవర్గ ప్రజల తలరాతను మార్చడం కూడా ఎమ్మెల్యే కొలికపూడి శ్రీనివాసరావుకు తెలుసు” అని స్పష్టం చేశారు. వ్యక్తుల విలువను కులాన్ని బట్టి కాకుండా వారి గుణాన్ని, సేవను బట్టి గుర్తించాల్సిన అవసరం ఉందని, చట్టం ముందు, సమాజం ముందు అందరూ సమానులేనని గుర్తుచేశారు. దళిత ఎమ్మెల్యేలపై ఆధిపత్యం చలాయించాలనుకునే పెత్తందారీ శక్తులపై సమాజమంతా ఏకమై తిరగబడాలని, కులాల గోడలను బద్దలుకొట్టి సమానత్వం, గౌరవాన్ని సాధించేందుకు ప్రతి ఒక్కరూ ఐక్యంగా పోరాడాలని పిలుపునిచ్చారు.
