జన గళం కడప/రాజంపేట బ్యూరో: వైఎస్సార్ కడప జిల్లా ప్రొద్దుటూరు పట్టణంలో నిర్వహించిన జల్ జీవన్ మిషన్ – అమరజీవి జలధార కార్యక్రమానికి విచ్చేసిన ఆంధ్రప్రదేశ్ ఉప ముఖ్యమంత్రి, జనసేన పార్టీ అధినేత శ్రీ కొణిదెల పవన్ కల్యాణ్‌ను రాజంపేట పార్లమెంట్ నియోజకవర్గ జనసేన పార్టీ ఇన్‌ఛార్జ్ యల్లటూరు శ్రీనివాసరాజు మర్యాదపూర్వకంగా కలిశారు.
ఈ భేటీ సందర్భంగా రాజంపేట పార్లమెంట్ నియోజకవర్గ పరిధిలోని తాజా రాజకీయ పరిణామాలు, స్థానిక ప్రజా సమస్యలు, పెండింగ్‌లో ఉన్న పలు అభివృద్ధి పనులపై డిప్యూటీ సీఎం పవన్ కల్యాణ్‌తో యల్లటూరు శ్రీనివాసరాజు సుదీర్ఘంగా చర్చించారు. నియోజకవర్గ ప్రజల తాగునీరు, సాగునీటి అవసరాలు, మౌలిక వసతుల కల్పనపై ప్రత్యేక దృష్టి సారించాలని, అభివృద్ధి కార్యక్రమాలకు అవసరమైన నిధులు మంజూరు చేయాలని ఉప ముఖ్యమంత్రి దృష్టికి తీసుకెళ్లారు. ప్రజా సమస్యలపై సానుకూలంగా స్పందించిన పవన్ కల్యాణ్, నియోజకవర్గ సమగ్ర ప్రగతికి ప్రభుత్వం తరఫున పూర్తి సహకారం ఉంటుందని భరోసా ఇచ్చారు. తమ నేత యల్లటూరు శ్రీనివాసరాజు జనసేనానితో భేటీ అయి ప్రజా సమస్యలను వివరించడం పట్ల రాజంపేట పార్లమెంట్ పరిధిలోని జనసైనికులు, వీర మహిళలు, పార్టీ శ్రేణులు హర్షం వ్యక్తం చేశారు.
