జన గళం భక్తి డెస్క్: బెజవాడ ఇంద్రకీలాద్రిపై జరుగుతున్న దసరా శరన్నవరాత్రి మహోత్సవాలు అత్యంత వైభవోపేతంగా సాగుతున్నాయి. ఉత్సవాల్లో భాగంగా నాల్గవ రోజున జగన్మాత శ్రీ కనకదుర్గమ్మ వారు భక్తులకు దివ్యమైన “శ్రీ మహాచండీ దేవి” విశేష అలంకారంలో దర్శనమిచ్చారు. సర్వశక్తి స్వరూపిణిగా, దుష్ట శిక్షణ శిష్ట రక్షణ చేసే చండీ అవతారాన్ని కనులారా వీక్షించేందుకు భక్తులు వేకువజాము నుంచే తరలివచ్చారు.
ఆలయ ప్రాంగణం రంగురంగుల పుష్పాలు, విద్యుద్దీపాలంకరణలతో శోభాయమానంగా ముస్తాబైంది. భక్తుల రద్దీతో క్యూలైన్లు కిక్కిరిసిపోగా, ‘జై దుర్గా.. భవానీ’ నామస్మరణతో ఇంద్రకీలాద్రి మార్మోగింది. భవానీ భక్తులు, మహిళలు, చిన్నారులకు ఎలాంటి అసౌకర్యం కలగకుండా అధికారులు ప్రత్యేక క్యూలైన్లను ఏర్పాటు చేసి నిరంతరం పర్యవేక్షిస్తున్నారు. ప్రసాదాల పంపిణీ, తాగునీరు తదితర సౌకర్యాలను పకడ్బందీగా అమలు చేస్తున్నారు.
