జన గళం ఆంధ్రప్రదేశ్ డెస్క్: ఆంధ్రప్రదేశ్ రాష్ట్రంలో స్థానిక సంస్థల ఎన్నికల రిజర్వేషన్ల ఖరారు ప్రక్రియ ఆసక్తికర రాజకీయ పరిణామాలకు వేదికవుతోంది. పార్వతీపురం మన్యం జిల్లా సాలూరు మున్సిపాలిటీ ఛైర్‌పర్సన్ పదవి బీసీ మహిళకు రిజర్వ్ కావడంతో అనూహ్య ఘటన చోటుచేసుకుంది. మున్సిపల్ పీఠాన్ని దక్కించుకునే క్రమంలో తెలుగుదేశం పార్టీ మాజీ కౌన్సిలర్ వైకుంఠపు హర్షవర్ధన్ తన ప్రియురాలైన మంజీరాను స్థానిక ఆలయంలో హుటాహుటిన వివాహం చేసుకున్నారు.
సాలూరు మున్సిపల్ ఛైర్‌పర్సన్ స్థానం బీసీ మహిళ కేటగిరీకి కేటాయించబడుతుందన్న సమాచారంతో, పోటీ చేసేందుకు అర్హత సాధించే ఉద్దేశంతోనే ఈ త్వరితగతిన పెళ్లి నిర్ణయం తీసుకున్నట్లు సమాచారం. ఆలయంలో నిరాడంబరంగా జరిగిన ఈ వివాహ వేడుకకు సంబంధించిన చిత్రాలు సామాజిక మాధ్యమాల్లో వైరల్‌గా మారడంతో స్థానికంగా మరియు జిల్లా రాజకీయాల్లో ఈ అంశం విస్తృత చర్చనీయాంశమైంది. పదవి కోసమే ఈ హడావుడి పెళ్లి జరిగిందంటూ స్థానిక ప్రజలు, రాజకీయ వర్గాలు ఆసక్తికరంగా చర్చించుకుంటున్నారు.
