జన గళం విజయవాడ బ్యూరో: పార్టీ ఆవిర్భావం నుంచి సిద్ధాంతాన్ని నమ్ముకుని నిస్వార్థంగా సేవలందిస్తున్న క్షేత్రస్థాయి జనసైనికులకు బాసటగా నిలిచేందుకు జనసేన పార్టీ సరికొత్త సంక్షేమ కార్యక్రమానికి శ్రీకారం చుట్టింది. పార్టీ కోసం అహర్నిశలు శ్రమిస్తున్న ఆటో కార్మికులకు నూతన ఆటోలు, చిరు వ్యాపారస్తులకు తోపుడు బండ్లు, వీర మహిళల స్వయం ఉపాధి నిమిత్తం ఉచిత కుట్టుమిషన్ల పంపిణీతో పాటు ఇతర పార్టీల నుండి జనసేనలోకి భారీ చేరికల కార్యక్రమాన్ని విజయవాడ వేదికగా నిర్వహించనున్నారు. అక్టోబర్ 7, 2026 బుధవారం ఉదయం 8:00 గంటలకు విజయవాడలోని ‘సుజనా ది వేన్యూ కన్వెన్షన్’ హాల్‌లో ఈ భారీ సదస్సు జరగనుంది.
ఈ కార్యక్రమానికి ముఖ్య అతిథులుగా శాసనమండలి సభ్యులు, ఏపీ గ్రీన్ ఎగ్జిక్యూటివ్ కమిటీ చైర్మన్ శ్రీ కొణిదెల నాగబాబు, జనసేన పార్టీ ప్రధాన కార్యదర్శి శ్రీ తాళ్లూరి రామ్, ఎన్టీఆర్ జిల్లా అధ్యక్షులు శ్రీ సామినేని ఉదయభాను హాజరుకానున్నారు. విశిష్ట అతిథులుగా ఏపీ మెడికల్ సర్వీసెస్ & ఇన్‌ఫ్రాస్ట్రక్చర్ డెవలప్‌మెంట్ కార్పొరేషన్ చైర్మన్ చిల్లపల్లి శ్రీనివాసరావు, పోలీస్ హౌసింగ్ కార్పొరేషన్ చైర్మన్ కళ్యాణం శివ శ్రీనివాస్ (కేకే), పార్టీ రాష్ట్ర కార్యదర్శి & ఏపీఐఐసీ డైరెక్టర్ మండలి రాజేష్, రాష్ట్ర నాయకులు పెనుగొండ సుబ్బారాయుడు తదితరులు పాల్గొంటారు. ఈ సందర్భంగా పార్టీలో వివిధ వర్గాల ప్రముఖులు చేరనున్నారు. పార్టీ రాష్ట్ర కార్యదర్శి, విజయవాడ పార్లమెంట్ సమన్వయకర్త అమ్మిశెట్టి వాసు ఆధ్వర్యంలో జరుగుతున్న ఈ కార్యక్రమానికి ఉమ్మడి కృష్ణా-ఎన్టీఆర్ జిల్లాల పరిధిలోని రాష్ట్ర, జిల్లా కమిటీలు, నియోజకవర్గాల ముఖ్య నాయకులు, వీర మహిళలు, జనసైనికులు భారీ సంఖ్యలో తరలివచ్చి విజయవంతం చేయాలని పిలుపునిచ్చారు.
Slug: vijayawada-janasena-welfare-distribution-auto-sewing-machines-joining-meet-naga-babu-ammisetti-vasu