రచన: జన గళం బ్యూరో, డా. బి.ఆర్ అంబేద్కర్ కోనసీమ: డాక్టర్ బి.ఆర్. అంబేద్కర్ కోనసీమ జిల్లా అసెంబ్లీ నియోజకవర్గాల్లో తాజా రాజకీయ వాతావరణం, ప్రభుత్వ పనితీరుపై ప్రజాభిప్రాయాన్ని విశ్లేషిస్తూ ప్రవీణ్ పుల్లాట నేతృత్వంలోని ‘రైజ్ గ్రూప్’ (RISE Group) తాజాగా రూపొందించిన ‘పొలిటికల్ ఎక్స్‌రే 2026’ గ్రౌండ్ అసెస్‌మెంట్ నివేదిక స్థానిక రాజకీయ వర్గాల్లో తీవ్ర కలకలం రేపుతోంది. క్షేత్రస్థాయి పరిశోధన, సమగ్ర సర్వే ఆధారంగా వెల్లడించిన ఈ ఫలితాల ప్రకారం కోనసీమ పరిధిలోని కీలక నియోజకవర్గాల్లో కూటమి పార్టీల పరిస్థితిపై ఆసక్తికర సమీకరణాలు వెలుగులోకి వచ్చాయి.
ఈ సర్వే నివేదిక ప్రకారం.. జిల్లాలోని కీలకమైన రాజోలు, పి. గన్నవరం, రామచంద్రాపురం నియోజకవర్గాలు కూటమికి అత్యంత క్లిష్టమైన ‘రిస్క్ జోన్’ (Risk Zone)లో ఉన్నట్లు తేలింది. స్థానిక సమస్యలు, సమన్వయ లోపాలు, ప్రజా వ్యతిరేకత ఈ స్థానాల్లో కూటమిని ఆందోళనలో పడేస్తున్నాయని విశ్లేషించారు. మరోవైపు ముమ్మిడివరం, కొత్తపేట నియోజకవర్గాల్లో కూటమి పట్టు నిలుపుకుంటూ పూర్తి ‘సేఫ్ జోన్’లో పటిష్టమైన స్థితిలో ఉన్నట్లు స్పష్టమైంది. ఇక జిల్లా కేంద్రమైన అమలాపురం అసెంబ్లీ నియోజకవర్గంలో ప్రజల నుంచి ‘మిశ్రమ స్పందన’ వ్యక్తమవుతోంది. రాబోయే స్థానిక సంస్థల ఎన్నికల ముంగిట అధికార కూటమి పార్టీలకు ఈ గ్రౌండ్ రిపోర్ట్ ఒక హెచ్చరికగా మారిందని, రిస్క్ జోన్‌లో ఉన్న స్థానాల్లో శ్రేణులు దిద్దుబాటు చర్యలు చేపట్టకపోతే భవిష్యత్తులో తీవ్ర ప్రతికూల ఫలితాలు తప్పవని రాజకీయ పరిశీలకులు భావిస్తున్నారు.
