జన గళం ఆంధ్రప్రదేశ్ డెస్క్: ఆంధ్రప్రదేశ్ రాష్ట్రంలో స్థానిక సంస్థల ఎన్నికల షెడ్యూల్ వెలువడిన నేపథ్యంలో ఉమ్మడి తూర్పుగోదావరి జిల్లా రాజకీయాలు ఒక్కసారిగా వేడెక్కాయి. జిల్లా పరిషత్ పీఠాన్ని దక్కించుకునేందుకు ప్రధాన పార్టీల్లో కసరత్తు ఊపందుకుంది. ఈ క్రమంలో తూర్పుగోదావరి జిల్లా జడ్పీ చైర్మన్ స్థానానికి జనసేన పార్టీ తరఫున ప్రముఖ నాయకురాలు దాసరి ప్రియ సౌజన్య పేరు బలంగా వినిపిస్తోంది. ఈ మేరకు ఆమె అభ్యర్థిత్వాన్ని సమర్థిస్తూ రూపొందించిన ప్రచార పోస్టర్లు, ఫ్లెక్సీలు సామాజిక మాధ్యమాల్లో విస్తృతంగా చక్కర్లు కొడుతున్నాయి.
పార్టీ ఆవిర్భావం నుంచి క్రియాశీలకంగా వ్యవహరిస్తూ, ప్రజా సమస్యలపై నిరంతరం గళం విప్పుతున్న దాసరి ప్రియ సౌజన్యకు జడ్పీ చైర్మన్ బాధ్యతలు అప్పగిస్తే జిల్లావ్యాప్తంగా పార్టీ మరింత బలపడుతుందని జనసేన శ్రేణులు భావిస్తున్నాయి. కూటమిలో భాగంగా జనసేనకు కేటాయించే స్థానాల్లో తూర్పుగోదావరి జిల్లా కీలకమైనది కావడంతో, మహిళా కోటా మరియు సామాజిక సమీకరణాల దృష్ట్యా ఆమె పేరును అధిష్టానం పరిశీలిస్తున్నట్లు సమాచారం. స్థానిక ఎన్నికల్లో సత్తా చాటేందుకు జనసైనికులు, వీరమహిళలు ఆమె అభ్యర్థిత్వంపై హర్షం వ్యక్తం చేస్తున్నారు.
