జన గళం ఆంధ్రప్రదేశ్ డెస్క్: ఆంధ్రప్రదేశ్ రాష్ట్రంలో స్థానిక సంస్థల ఎన్నికల షెడ్యూల్ విడుదలైన నేపథ్యంలో రాష్ట్రవ్యాప్తంగా ఎన్నికల ప్రవర్తనా నియమావళి (మోడల్ కోడ్ ఆఫ్ కండక్ట్) తక్షణమే అమల్లోకి వచ్చిందని రాష్ట్ర ఎన్నికల కమిషనర్ (ఎస్ఈసీ) అనిల్ చంద్ర పునేఠా స్పష్టం చేశారు. ఓటర్లను ప్రలోభపెట్టే విధంగా ఎలాంటి నూతన పథకాలు, కొత్త అభివృద్ధి ప్రాజెక్టులను ప్రకటించరాదని ఆదేశించారు. నిబంధనలను కచ్చితంగా అమలు చేయాలంటూ ప్రభుత్వ ప్రధాన కార్యదర్శి (సీఎస్)కి అధికారికంగా లేఖ రాశారు.
అయితే ఇప్పటికే అమలవుతున్న సంక్షేమ పథకాలు, నిర్మాణంలో ఉన్న అభివృద్ధి ప్రాజెక్టులకు ఎలాంటి ఆటంకం ఉండదని, లబ్ధిదారులకు సంక్షేమ ఫలాలు యథావిధిగా అందుతాయని కమిషన్ స్పష్టం చేసింది. ఎన్నికల ప్రక్రియ ముగిసేవరకు అధికారుల బదిలీలు, పదోన్నతులపై పూర్తిస్థాయి నిషేధం ఉంటుందని, అత్యవసరమైతే కమిషన్ ముందస్తు అనుమతి తప్పనిసరి అని పేర్కొంది. ఈ మార్గదర్శకాలను అన్ని ప్రభుత్వ శాఖలు కచ్చితంగా పాటించేలా ఆదేశాలు జారీ చేయాలని సీఎస్‌ను కోరారు.
