జన గళం నూజివీడు డెస్క్: ఏలూరు జిల్లా నూజివీడు పట్టణంలో దసరా శరన్నవరాత్రి ఉత్సవాల వేళ ట్రాఫిక్ నిబంధనలను కొందరు వాహనదారులు పూర్తిగా గాలికి వదిలేస్తున్నారు. చారిత్రాత్మక కోట మహిషాసుర మర్దిని అమ్మవారి ఆలయ పరిసరాల్లో భక్తుల రద్దీ విపరీతంగా పెరగడంతో రాకపోకలకు తీవ్ర అంతరాయం ఏర్పడుతోంది. ఈ క్రమంలో పలువురు ఆటో డ్రైవర్లు, కార్ల యజమానులు వన్‌వే (ఏకముఖ మార్గం) నిబంధనలను ఉల్లంఘిస్తూ రాంగ్ రూట్‌లో దూసుకొస్తున్నారు.
పక్క సందుల నుంచి ఏకపక్షంగా ప్రధాన వన్‌వే మార్గంలోకి ఎదురుదిశగా వాహనాలను నడుపుతుండటంతో నిత్యం ట్రాఫిక్ జామ్‌లు ఏర్పడుతున్నాయి. కాలినడకన అమ్మవారి దర్శనానికి వెళ్లే భక్తులు, మహిళలు, వృద్ధులు తీవ్ర ఇబ్బందులు ఎదుర్కొంటున్నారు. ఇలాంటి బాధ్యతారాహిత్య డ్రైవింగ్ వల్ల ప్రమాదాలు జరిగే అవకాశముందని స్థానికులు ఆందోళన చెందుతున్నారు. పండుగ వేళ వన్‌వే ఉల్లంఘనలకు పాల్పడే వారిపై ట్రాఫిక్ పోలీసులు ప్రత్యేక నిఘా ఉంచి కఠిన చర్యలు తీసుకోవాలని పట్టణ ప్రజలు డిమాండ్ చేస్తున్నారు.