జన గళం పెడన డెస్క్: కృష్ణా జిల్లా పెడన పురపాలక సంఘం సాధారణ ఎన్నికల్లో ఎన్డీయే కూటమి సమరశంఖం పూరించింది. ఉప ముఖ్యమంత్రి, జనసేన పార్టీ అధినేత శ్రీ కొణిదెల పవన్ కళ్యాణ్ గారి ఆశీస్సులతో పెడన మున్సిపల్ చైర్‌పర్సన్ అభ్యర్థిగా ఎంపికైన మాజీ మున్సిపల్ చైర్‌పర్సన్ శ్రీమతి బళ్ల జ్ఞాన లింగ నాగ జ్యోత్స్నారాణి గారు ఆదివారం (18 అక్టోబర్ 2026) మున్సిపల్ కార్యాలయంలో రిటర్నింగ్ అధికారికి లాంఛనంగా నామినేషన్ పత్రాలను సమర్పించారు.
మచిలీపట్నం పార్లమెంట్ సభ్యులు శ్రీ వల్లభనేని బాలశౌరి గారి సూచనల మేరకు స్థానిక ఎమ్మెల్యే శ్రీ కాగిత కృష్ణప్రసాద్ గారు, నియోజకవర్గ జనసేన సమన్వయకర్తలు శ్రీ లింగం నాగేశ్వరరావు, శ్రీ వికృతి శ్రీనివాస్ బాబు గార్లతో కలిసి ఎన్నికల అధికారికి నామినేషన్ పత్రాలను స్వయంగా అందజేశారు. మేళతాళాలు, బాణసంచా మోతలు, కూటమి కార్యకర్తల నినాదాలతో పట్టణ వీధుల్లో నిర్వహించిన భారీ ర్యాలీ ఆద్యంతం కోలాహలంగా సాగింది. టీడీపీ, జనసేన, బీజేపీ నాయకులు, వీర మహిళలు, కార్యకర్తలు వేలాదిగా తరలివచ్చారు. గతంలో చైర్‌పర్సన్‌గా అందించిన ప్రజాసేవ, కూటమి ప్రభుత్వ సంక్షేమాభివృద్ధి పథకాలే బళ్ల జ్యోత్స్నారాణి గారిని భారీ మెజారిటీతో గెలిపిస్తాయని నాయకులు ధీమా వ్యక్తం చేశారు.
