జన గళం బ్యూరో, విజయవాడ: స్థానిక సంస్థల, నగరపాలక సంస్థ ఎన్నికల నగారా మోగనున్న వేళ విజయవాడ నగర రాజకీయాలు ఒక్కసారిగా వేడెక్కాయి. గతంలో ప్రజారాజ్యం పార్టీ తరఫున విజయవాడ తూర్పు శాసనసభ్యుడిగా పనిచేసిన ప్రముఖ నేత యలమంచిలి రవి జనసేన పార్టీలో చేరడానికి రంగం సిద్ధం చేసుకున్నట్లు విశ్వసనీయ వర్గాల సమాచారం. పార్టీ అధినేత, ఉప ముఖ్యమంత్రి కొణిదల పవన్ కళ్యాణ్ సమక్షంలో త్వరలోనే ఆయన పసుపు-ఎరుపు జనసేన కండువాను కప్పుకోనున్నట్లు ప్రచారం ఊపందుకుంది.
దివంగత ప్రముఖ సహకార నేత యలమంచిలి నాగేశ్వరరావు రాజకీయ వారసుడిగా ప్రవేశించిన యలమంచిలి రవి, 2009లో ప్రజారాజ్యం పార్టీ ఆవిర్భావం సమయంలో చిరంజీవి పిలుపుతో ప్రత్యక్ష ఎన్నికల బరిలోకి దిగి ఎమ్మెల్యేగా విజయం సాధించారు. నియోజకవర్గంలో వివాదరహితుడిగా, కార్యకర్తలకు నిరంతరం అందుబాటులో ఉండే నాయకుడిగా ఆయనకు మంచి గుర్తింపు ఉంది. ఆ తర్వాత పలు రాజకీయ పార్టీలలో కొనసాగినప్పటికీ, గత కొంతకాలంగా మౌనంగా ఉంటూ వస్తున్నారు. అయితే రానున్న మున్సిపల్ ఎన్నికల్లో విజయవాడ నగర మేయర్ పీఠాన్ని జనసేన లక్ష్యంగా ఎంచుకుందన్న ప్రచారం నేపథ్యంలో, పాత పీఆర్పీ సహచరుల సమన్వయంతో రవి జనసేన గూటికి చేరేందుకు సిద్ధమైనట్లు తెలుస్తోంది.
ఇటీవలే కీలక నేత వంగవీటి రాధా జనసేన తీర్థం పుచ్చుకున్న నేపథ్యంలో, యలమంచిలి రవి కూడా పార్టీలో చేరితే విజయవాడ తూర్పు, సెంట్రల్ పరిధిలో జనసేన ఓటు బ్యాంక్ మరింత పటిష్టమవుతుందని విశ్లేషకులు భావిస్తున్నారు. ఈ చేరిక ద్వారా అటు సామాజిక సమీకరణాలు, ఇటు రాజకీయంగా పట్టు సాధించవచ్చని పార్టీ భావిస్తున్నట్లు సమాచారం. ఈ పరిణామంపై త్వరలోనే అధికారిక ప్రకటన వెలువడే అవకాశం ఉందని సమాచారం.