జన గళం మైలవరం డెస్క్: స్థానిక సంస్థల సమరంలో మైలవరం నియోజకవర్గంలో జనసేన పార్టీ కార్యకర్తల ఆత్మగౌరవం, పార్టీ ఎదుగుదలకు ప్రాధాన్యతనిస్తూ తగిన స్థానాలు కేటాయించాలని జనసేన మైలవరం నియోజకవర్గ సమన్వయకర్త పులిపాక ప్రకాష్ బాబు పార్టీ అధ్యక్షులు, ఉప ముఖ్యమంత్రి శ్రీ పవన్ కళ్యాణ్ గారికి లేఖ రాశారు. కూటమి అంటే కలిసి సాగడమే తప్ప ఇతర పార్టీల కింద పనిచేయడం కాదని, సమర్థవంతమైన నాయకత్వం తన వారి కోసం, క్షేత్రస్థాయి క్యాడర్ ఎదుగుదల కోసం నిలబడాలని ఆయన స్పష్టం చేశారు.
మైలవరం నియోజకవర్గ పరిధిలో మొత్తం 5 ఎంపీపీలు, 5 జెడ్పీటీసీ స్థానాలతో పాటు ఒక మున్సిపాలిటీ (40 వార్డులు) ఉన్నాయని ఆయన లేఖలో ప్రస్తావించారు. ఇందులో జనసేన పార్టీకి కనీసం 2 ఎంపీపీలు, 2 జెడ్పీటీసీలు మరియు కొండపల్లి మున్సిపాలిటీలో 15 వార్డులను కేటాయించాలని కోరారు. ముఖ్యంగా జి.కొండూరు మండలం జెడ్పీటీసీ స్థానంతో పాటు రెడ్డిగూడెం, ఇబ్రహీంపట్నం మండలాల్లో జనసేన మండల ప్రెసిడెంట్ అభ్యర్థులు బలంగా ఉన్నందున ఆయా స్థానాల్లో పోటీ చేసే అవకాశం కల్పించాలని ఆయన విజ్ఞప్తి చేశారు. పార్టీ పదవులు కేవలం అలంకారప్రాయంగా ఉండకూడదని, క్యాడర్‌ను నాయకులుగా తీర్చిదిద్దేందుకే ఉపయోగపడాలని పేర్కొన్నారు.
