జన గళం మంగళగిరి డెస్క్: ఆంధ్రప్రదేశ్ రాష్ట్రంలో ప్రశాంతంగా, ప్రజాస్వామ్యబద్ధంగా సాగుతున్న స్థానిక సంస్థల ఎన్నికల ప్రక్రియను భగ్నం చేసేందుకు వైఎస్సార్ కాంగ్రెస్ పార్టీ పక్కా కుట్ర పన్నిందని జనసేన పార్టీ అగ్ర నాయకత్వం తీవ్రస్థాయిలో ధ్వజమెత్తింది. శనివారం సాయంత్రం జనసేన పార్టీ కేంద్ర కార్యాలయంలో ఏర్పాటు చేసిన విలేకరుల సమావేశంలో పార్టీ రాష్ట్ర ప్రధాన కార్యదర్శి శ్రీ తమ్మిరెడ్డి శివశంకర్, ఉపాధ్యక్షులు శ్రీ బి. మహేందర్ రెడ్డి, చేనేత వికాస విభాగం చైర్మన్ శ్రీ చిల్లపల్లి శ్రీనివాసరావు గార్లు పాల్గొని వైసీపీ తీరుపై నిప్పులు చెరిగారు.
రాయలసీమలోని బడుగు, బలహీన, అణగారిన వర్గాలకు రాజ్యాంగబద్ధంగా స్థానిక అధికారం దక్కడం వైసీపీకి ఏమాత్రం ఇష్టం లేదని నేతలు మండిపడ్డారు. ప్రజలతో ఎన్నుకోబడ్డ ఎంపీ కనీస నియమావళి పాటించకుండా 100 మందితో నామినేషన్ కేంద్రంలోకి చొరబడటం దారుణమని, రాజ్యాంగం పట్ల గౌరవం లేకుండా ప్రవర్తించారని ఆరోపించారు. 2021లో అధికార మదంతో చేసిన అరాచకాలు ఇప్పుడు చెల్లవని, శాంతిభద్రతలకు విఘాతం కలిగిస్తే కూటమి ప్రభుత్వం చూస్తూ ఊరుకోదని స్పష్టం చేశారు. డిపాజిట్లు కూడా దక్కవనే భయంతోనే బయటి ప్రాంతాల నుంచి రౌడీలను రప్పించి హింసను ప్రేరేపిస్తున్నారని, అధికార యంత్రాంగం నిష్పక్షపాతంగా వ్యవహరించి బాధ్యులపై ఉక్కుపాదం మోపాలని డిమాండ్ చేశారు.
