జన గళం నూజివీడు డెస్క్: నూజివీడు మున్సిపల్ ఎన్నికల సమరానికి కూటమి శ్రేణులు సమరశంఖం పూరించాయి. ఎన్నికల నామినేషన్ల ప్రక్రియ సందర్భంగా పాతపేట శివాలయంలో రాష్ట్ర గృహ నిర్మాణ, సమాచార పౌర సంబంధాల శాఖ మంత్రి శ్రీ కొలుసు పార్థసారథి గారు పరమశివుడికి ప్రత్యేక పూజలు నిర్వహించారు. అనంతరం కూటమి తరఫున బరిలోకి దిగుతున్న కౌన్సిలర్ అభ్యర్థులకు నామినేషన్ పత్రాలను అధికారికంగా అందజేశారు.
ఈ సందర్భంగా మంత్రి మాట్లాడుతూ.. రాష్ట్రంలో అభివృద్ధి, సంక్షేమాన్ని పరుగులు పెట్టిస్తున్న అమరావతి శిల్పి, ముఖ్యమంత్రి నారా చంద్రబాబు నాయుడు గారి నాయకత్వాన్ని మరింత బలోపేతం చేయాలని పిలుపునిచ్చారు. ఇందుకోసం నూజివీడు మున్సిపాలిటీలోని మొత్తం 36 వార్డులకు 36 వార్డుల్లోనూ కూటమి అభ్యర్థులను గెలిపించి సీఎం చంద్రబాబు గారికి కానుకగా సమర్పించాలని శ్రేణులను ఉత్తేజపరిచారు. గత 30 ఏళ్లలో ఎన్నడూ జరగని అభివృద్ధి కూటమి పాలనలోనే సాధ్యమైందని, టీడీపీ, జనసేన, బీజేపీ నాయకులు, కార్యకర్తలు విభేదాలు వీడి సమన్వయంతో పనిచేసి నూజివీడుపై కూటమి జెండా ఎగురవేయాలని కోరారు.
