జన గళం ఆకివీడు డెస్క్: పశ్చిమ గోదావరి జిల్లా ఆకివీడు నగర పంచాయతీ/మున్సిపల్ సమరంలో కాంగ్రెస్ పార్టీ తమ అభ్యర్థిత్వాన్ని ఖరారు చేసుకుని ఎన్నికల బరిలోకి దిగుతోంది. కేంద్ర మాజీ మంత్రివర్యులు, సీనియర్ నాయకులు శ్రీ కనుమూరి బాపిరాజు గారి సంపూర్ణ ఆశీస్సులతో ఆకివీడు మున్సిపల్ ఛైర్‌పర్సన్ స్థానానికి కాంగ్రెస్ పార్టీ అభ్యర్థిగా శ్రీమతి గంధం పార్వతి గారు పోటీకి సిద్ధమయ్యారు.
ఈ సందర్భంగా పార్టీ ముఖ్య నేతలు శ్రీ కేబీఆర్ నాయుడు, శ్రీ జెఎస్ఆర్, శ్రీ అంకెం సీతారామ్, శ్రీ వేగేశ్న వెంకట గోపాలకృష్ణ రాజు, శ్రీ గంధం సుబ్బారావు గార్ల సమక్షంలో ఆమె అభ్యర్థిత్వాన్ని బలపరుస్తూ నిర్ణయం తీసుకున్నారు. పట్టణ ప్రజలతో ఉన్న సాన్నిహిత్యం, నిబద్ధత గల ప్రజాసేవే ధ్యేయంగా వార్డుల్లో ప్రజల మద్దతు కూడగట్టేందుకు కాంగ్రెస్ పార్టీ శ్రేణులు సన్నద్ధమవుతున్నాయి. ఆకివీడు మున్సిపాలిటీ సమగ్ర అభివృద్ధి కోసం తమ అభ్యర్థిని ఆశీర్వదించాలని నాయకులు పట్టణ ప్రజలకు విజ్ఞప్తి చేశారు.
