జన గళం రాజకీయ డెస్క్: ఆంధ్రప్రదేశ్‌లో తెలుగుదేశం, జనసేన, బీజేపీ కూటమి మధ్య సమన్వయం మరింత బలోపేతం కావాలంటే నియోజకవర్గాల స్థాయిలో సమన్వయ కమిటీలను త్వరగా ఏర్పాటు చేయాలని సోషల్ మీడియా వేదికగా మనోహర్ తోట సూచించారు. ముఖ్యమంత్రి నారా చంద్రబాబు నాయుడు, ఉప ముఖ్యమంత్రి పవన్ కల్యాణ్, మంత్రి నారా లోకేశ్ ఈ అంశంపై దృష్టి సారించాలని ఆయన కోరారు.
అవనిగడ్డ నియోజకవర్గంలో జనసేన ఎమ్మెల్యేపై కొందరు తెలుగుదేశం పార్టీ నాయకులు, స్థానిక సంఘాల పెద్దలు బహిరంగంగా విమర్శలు చేస్తున్నారనే అంశాన్ని మనోహర్ తోట ప్రస్తావించారు. ఒక నియోజకవర్గంలో చోటుచేసుకుంటున్న పరిణామాలు కూటమి పార్టీల మధ్య సంబంధాలపై ప్రభావం చూపకుండా ముందస్తు సమన్వయం అవసరమని ఆయన అభిప్రాయపడ్డారు.
అవనిగడ్డలో కనిపిస్తున్న తరహా బహిరంగ విమర్శలు మిగిలిన 174 నియోజకవర్గాల్లోనూ చోటుచేసుకుంటే కూటమి ఐక్యతకు ఇబ్బందులు తలెత్తే అవకాశం ఉందని ఆయన ప్రశ్నించారు. పొత్తు ధర్మాన్ని పాటిస్తూ పరస్పర గౌరవంతో వ్యవహరించడం, సమస్యలు ఉంటే అంతర్గత చర్చల ద్వారా పరిష్కరించుకోవడం అవసరమని పేర్కొన్నారు.
కూటమి పార్టీల మధ్య సమన్వయ కమిటీలు ఏర్పాటు చేస్తే స్థానిక స్థాయిలో తలెత్తే విభేదాలను చర్చల ద్వారా పరిష్కరించడానికి అవకాశం ఉంటుందని మనోహర్ తోట సూచించారు. ఆయన చేసిన ఈ వ్యాఖ్యలు కూటమి పార్టీల మధ్య స్థానిక సమన్వయం, పరస్పర సహకారంపై మరోసారి చర్చకు దారితీశాయి.
సోషల్ మీడియా వ్యాఖ్యలు: మనోహర్ తోట