జన గళం రాజకీయ డెస్క్: జనసేన పార్టీ ప్రధాన కార్యాలయం వద్ద ఆ పార్టీ ఎన్టీఆర్ జిల్లా అధ్యక్షుడు, మాజీ విప్ సామినేని ఉదయభానుకు చేదు అనుభవం ఎదురైంది. మాజీ ఎమ్మెల్యే వంగవీటి రాధా జనసేన తీర్థం పుచ్చుకున్న కొద్దిసేపటికే పార్టీ కేంద్ర కార్యాలయానికి చేరుకున్న ఉదయభాను కాన్వాయ్‌ను భద్రతా సిబ్బంది ప్రధాన గేటు వద్దే నిలిపివేశారు. దాదాపు 15 నిమిషాల పాటు అనుమతి కోసం ఆయన గేటు బయటే నిరీక్షించాల్సి వచ్చింది.
చివరికి కారును లోపలికి అనుమతించబోమని, దిగి రావాలని సెక్యూరిటీ స్పష్టం చేయడంతో ఆయన నడుచుకుంటూ లోపలికి వెళ్లారు. సొంత జిల్లాకు చెందిన వంగవీటి రాధా చేరిక వంటి కీలక పరిణామంలో జిల్లా అధ్యక్షుడికే సరైన ప్రాధాన్యత దక్కకపోవడం, కార్యాలయ సిబ్బంది వ్యవహరించిన తీరుపై ఉదయభాను అనుచరులు తీవ్ర అసహనం వ్యక్తం చేశారు. ఈ పరిణామంపై పిడుగు విజయ్ ‘ఎక్స్’ (ట్విట్టర్), త్రెడ్స్ వేదికగా ప్రశ్నిస్తూ పోస్టులు పెట్టడంతో ఈ వ్యవహారం రాజకీయ వర్గాల్లో తీవ్ర చర్చనీయాంశంగా మారింది.
