జన గళం క్రైమ్ డెస్క్: తిరుపతి జిల్లా వేంకటగిరిలో వైభవంగా జరుగుతున్న శ్రీ పోలేరమ్మ అమ్మవారి జాతర ముగింపు కార్యక్రమాల నేపథ్యంలో భద్రతా ఏర్పాట్లను జిల్లా ఎస్పీ ఎల్. సుబ్బరాయుడు క్షేత్రస్థాయిలో పరిశీలించారు. జాతరకు భక్తులు భారీ సంఖ్యలో తరలివస్తున్న తరుణంలో ఎలాంటి అవాంఛనీయ సంఘటనలు చోటుచేసుకోకుండా పోలీసులు పటిష్టమైన బందోబస్తు ఏర్పాట్లు చేశారు. అమ్మవారి ఆలయంతో పాటు ఊరేగింపు సాగే మార్గాలు, క్యూలైన్లు, ప్రవేశ నిష్క్రమణ ప్రాంతాలను ఎస్పీ స్వయంగా సందర్శించి భక్తుల రాకపోకలను పరిశీలించారు. భక్తుల రద్దీకి తగువిధంగా సిబ్బందిని మోహరించి ట్రాఫిక్ మరియు క్యూలైన్లను క్రమబద్ధీకరించాలని అధికారులను అప్రమత్తం చేశారు.
జాతర ప్రాంతంలో ఏర్పాటు చేసిన సీసీ కెమెరాల పనితీరును, కమాండ్ కంట్రోల్ రూమ్ ద్వారా జరుగుతున్న నిఘా తీరును ఎస్పీ ఎల్. సుబ్బరాయుడు పరిశీలించారు. ప్రధాన రద్దీ ప్రాంతాలు మరియు ఊరేగింపు మార్గాలను నిరంతరం పర్యవేక్షిస్తూ, ఎక్కడైనా అనుమానాస్పద పరిస్థితులు కనిపిస్తే వెంటనే స్పందించేలా సిబ్బంది అప్రమత్తంగా ఉండాలని ఆదేశించారు. అంతేకాకుండా డ్రోన్ల ద్వారా కూడా జాతర ప్రాంగణంపై ప్రత్యేక నిఘా ఉంచాలని సూచించారు. మహిళలు, వృద్ధులు, చిన్నారులు సహా విచ్చేసే భక్తులందరికీ ఎలాంటి ఇబ్బందులు తలెత్తకుండా పోలీసులు మర్యాదపూర్వకంగా వ్యవహరించాలని స్పష్టం చేశారు.
జాతర ముగింపు కార్యక్రమాలు విజయవంతంగా పూర్తయ్యే వరకు పోలీస్ యంత్రాంగం పూర్తి అప్రమత్తతతో విధులు నిర్వహించాలని ఎస్పీ స్పష్టం చేశారు. అత్యవసర పరిస్థితులు లేదా భద్రతా పరమైన సమస్యలు ఎదురైతే ప్రజలు తక్షణ సహాయం కోసం డయల్ నంబరు 112 కు సమాచారం అందించాలని కోరారు. జాతరను ప్రశాంతంగా, సురక్షితంగా నిర్వహించేందుకు ఇతర శాఖలతో సమన్వయం చేసుకుంటూ విధులు నిర్వహిస్తున్నామని తెలిపారు. భక్తులందరూ పోలీసు సిబ్బందికి సహకరిస్తూ, క్రమశిక్షణతో క్యూలైన్లు పాటించి జాతరను ప్రశాంతంగా ముగించేందుకు సహకరించాలని ఎస్పీ విజ్ఞప్తి చేశారు.
Slug: venkatagiri-poleramma-jathara-police-security-sp-subbarayudu