జన గళం పెడన డెస్క్: పట్టణ స్థానిక సంస్థల సమరంలో కృష్ణా జిల్లా పెడన మున్సిపల్ పీఠం పంచాయితీ ఎట్టకేలకు ఒక కొలిక్కి వచ్చింది. తీవ్ర ఉత్కంఠ, రాజకీయ సమీకరణాల నడుమ పెడన మున్సిపల్ చైర్‌పర్సన్ స్థానం మాజీ చైర్‌పర్సన్ శ్రీమతి బళ్ల జ్ఞానలింగ జ్యోత్స్నారాణి గారికే పదిలమైంది. జనసేన పార్టీ అధినేత శ్రీ పవన్ కళ్యాణ్ గారు విడుదల చేసిన మలి జాబితాలో పెడన అభ్యర్థిగా ఆమె పేరును ఖరారు చేయడంతో, ఈ రోజు (ఆదివారం) కూటమి బలపరిచిన జనసేన అధికారిక చైర్‌పర్సన్ అభ్యర్థిగా ఆమె తన నామినేషన్ పత్రాలను ఎన్నికల రిటర్నింగ్ అధికారికి సమర్పించనున్నారు.
ఈ సందర్భంగా పెడన పట్టణంలో టీడీపీ, జనసేన, బీజేపీ నాయకులు, కార్యకర్తలు మరియు చేనేత వర్గాల మద్దతుతో భారీ ర్యాలీ నిర్వహించేందుకు ఏర్పాట్లు పూర్తయ్యాయి. గతంలో మున్సిపల్ చైర్‌పర్సన్‌గా పట్టణాభివృద్ధికి చేసిన కృషి, దేవాంగ సామాజిక వర్గంలో ఉన్న తిరుగులేని ఆదరణే కూటమికి విజయతీరాలకు చేరుస్తుందని నాయకులు ధీమా వ్యక్తం చేస్తున్నారు. ప్రత్యర్థి వైఎస్సార్‌సీపీకి దీటైన జవాబు చెబుతూ పెడన మున్సిపల్ పీఠంపై కూటమి జెండా ఎగురవేస్తామని ఈ సందర్భంగా కూటమి శ్రేణులు స్పష్టం చేస్తున్నాయి.
