జన గళం సత్తెనపల్లి డెస్క్: పల్నాడు జిల్లా సత్తెనపల్లి పట్టణంలో స్థానిక సంస్థల సమరానికి ముందు ఎన్డీయే కూటమిలో తీవ్ర అసంతృప్తి జ్వాలలు చెలరేగాయి. మున్సిపల్ ఎన్నికల్లో సీట్ల సర్దుబాటుపై అసంతృప్తితో ఉన్న జనసేన పార్టీ అభ్యర్థులు సత్తెనపల్లి టౌన్ నుంచి రెబెల్స్‌గా బరిలోకి దిగేందుకు సిద్ధమయ్యారు. ఈ మేరకు జనసేన నాయకురాలు శివపార్వతి సోషల్ మీడియా వేదికగా చేసిన సంచలన ప్రకటన రాజకీయ వర్గాల్లో పెను దుమారం రేపుతోంది.
”కూటమిలో ఎప్పుడూ ఒక వైపు మాత్రమే త్యాగాలు ఉండకూడదు. గెలిచినా ఓడినా అడుగు ముందుకే వేస్తాం. ఎవరి కోసమో పోలింగ్ బూతుల్లో కొట్లాడలేము.. ఈసారి మా కోసం మేము యుద్ధం చేస్తాం, వెనక్కి తగ్గేది లేదు” అంటూ పార్టీ శ్రేణులు తెగేసి చెప్పాయి. అధిష్టానం సహకరించి బీ-ఫామ్ ఇస్తే పార్టీ గుర్తుపైనే పోటీ చేస్తామని, లేనిపక్షంలో ఇండిపెండెంట్‌గానైనా బరిలో నిలుస్తామని స్పష్టం చేశాయి. చివరగా “సారీ పవన్ కళ్యాణ్ అన్నా.. ఈసారి మీ మాట వినలేము” అంటూ పార్టీ అధినేతను ఉద్దేశించి పేర్కొనడం స్థానిక కూటమి వర్గాల్లో తీవ్ర చర్చనీయాంశంగా మారింది. సీట్ల సర్దుబాటులో స్థానిక నాయకత్వం తమకు తగిన న్యాయం చేయలేదన్న ఆవేదనతోనే ఈ నిర్ణయానికి వచ్చినట్లు కేడర్ చెబుతోంది.
